საქართველო-რუსეთის საზღვართან საქართველოს შს სამინისტროს სპეცოპერაცია ამ წუთებშიც მიმდინარეობს. აღნიშნულის შესახებ „ინტერნეტ.ჯი“-ს შს სამინისტროს პრესსამსახურის ხელმძღვანელმა სალომე მახარაძემ განუცხადა.

მისი თქმით, სპეცოპერაციის მიმდინარეობის შესახებ ინფორმაცია შსს-ს საიტზე ოპერატიულად ვრცელდება.

„ბოლო ინფორმაციით, დევნის ოპერაციის განხორციელების დროს დაიღუპა სპეცდანიშნულების რაზმის 3 თანამშრომელი, 5 კი დაიჭრა.

რაც შეეხება დივერსანტთა ჯგუფს, ლიკვიდირებულია შეიარაღებული დაჯგუფების 11 წევრი. ამჟამად ალყაშია მოქცეული 6 დივერსანტი“,- განაცხადა მახარაძემ.

პრესსამსახურის ინფორმაციით, დაღუპული ქართველი თანამშრომლების დაკრძალვის ხარჯებს სახელმწიფო გაიღებს.

Internet.ge