ლოპოტას ხეობში შეიარაღებული დაჯგუფების დევნის ოპერაცია გრძელდება. ამ დროისთვის კი, სოფელ ლაფანყურში სიმშვიდეა. მას შემდეგ, რაც ლოპოტას ხეობაში დევნის ოპერაცია განახლდა, ცენტრიდან ხეობის მიმართულებით არცერთი სამხედრო, შსს და თავდაცვის სპეციალური დანიშნულების რაზმის წევრი არ შეუყვანიათ.

„ინტერენეტ.ჯი“ იმყოფებოდა ხეობის ტერიტორიაზე, რომელიც სოფელ ლაფანყურის ცენტრიდან რამდენიმე ასეულ მეტრშია. ადგილზე იმყოფებიან კრიმინალური პოლიციის თანამშრომლები, რომლებიც მდინარე ლოპოტას ხიდზე დგანან და იქ მისვლის საშუალებას არავის აძლევენ.

მთელი ღამის განმავლობაში სოფელ ლაფანყურში სიმშვიდე იყო. გამთენიისას, ხეობის მიმართულებით სოფლის ცენტრიდან  სასწრაფო სამედიცინო დახმარების ორი ბირიგადა და შსს-ს კუთვნილი რამდენიმე პიკაპის ტიპის ავტომობილი დაიძრა. გვიან ღამით, ხეობაში შს მინისტრი ბაჩო ახალაია შევიდა, რომელსაც ლოპოტას ხეობა ამ დრომდე არ დაუტოვებია, იქვე რჩება სასწრაფო-სამედიცინო დახმარების 2 ბრიგადა.

შეგახსენებთ, შინაგან საქმეთა სამინისტროს მიერ შეიარაღებული დაჯგუფების მიმართ დევნის ოპერაციის განხორციელების დროს დაიღუპა სპეცდანიშნულების რაზმის 3 თანამშრომელი და დაიჭრა 5. რაც შეეხება დივერსანტთა ჯგუფს, ლიკვიდირებულია შეიარაღებული დაჯგუფების 11 წევრი. ამჟამად ალყაშია მოქცეული 6 დივერსანტი. მიმდინარეობს მათი დაკავების ღონისძიება. 

internet.ge