ამ წუთებში საქართველოს პრეზიდენტი თბილისის იუსტიციის სახლში იმყოფება. მიხეილ სააკაშვილმა ცნობილი იტალიელი არქიტექტორის - მასიმილიანო ფუქსასის პროექტით შექმნილი თანამედროვე სტანდარტებით აღჭურვილი იუსტიციის სახლი გახსნა, რომელიც ერთ შენობაში გააერთიანებს სახელმწიფო და კერძო სერვისებს. 

ქვეყნის პირველი პირის თქმით, ახალი იუსტიციის სახლი გათვლილია საქართველოს რიგით მოქალაქეებზე. პრეზიდენტმა დღევანდელ დღეს ისტორიული უწოდა.

„მთავრობა განსაკუთრებულ ფასეულობას არ წარმოადგენს, ხალხი კი არის ყველაფერი. ეს სახლი არის სიმბოლო ახალი ტიპის საქართველოს მთავრობის, ეს ანტითეზისია წარსული ინსტიტუტების და დაწესებულებების. სრული ანტითეზისია ასევე, გლდანის მე-8 საპყრობილის. ვერცერთი წარსული პრაქტიკა ვერ მოიკიდებს ფეხს ჩვენ ინსტიტუტებში“, - განაცხადა სააკაშვილმა.

პრეზიდენტის თქმით, მიუხედავად პროვოკაციისა, ჩავარდნისა და დაბრკოლებისა, მთავრობა დანაპირებს ასრულებს.

ცნობილი იტალიელი არქიტექტორის - მასიმილიანო ფუქსასის პროექტით შექმნილი თანამედროვე ნაგებობა სახელმწიფო და კერძო სერვისებს აერთიანებს. იუსტიციის სახლში გაერთიანდება 300-ზე მეტი სერვისი, მოქალაქეებს კი, ერთდროულად 400 ოპერატორი მოემსახურება.

internet.ge