პატიმრების წამებისა და გაუპატიურების კადრების გავრცელების შემდგომ საპროტესტო აქციაზე დაკავებული სტუდენტის „ლაბორატორია 1918“-ის წევრ სანდრო ცაგარელისთვის დაკისრებულ 400 ლარიან ჯარიმას მომღერალი ცისანა სეფიაშვილი გადაიხდის.

აღნიშნულის შესახებ სეფიაშვილმა განცხადება  ფონდ "ქომაგში" გამართულ პრესკონფერენციაზე გააკეთა. ფონდმა "ქომაგმა" მშვიდობიანი აქციის დროს დაჯარიმებულ მოქალაქეებს მხარდაჭერა 25 სექტემბერს გამოუცხადა და დახმარებას დაპირდა.

ფონდის განცხადებას მოგვიანებით სამოქალაქო საზოგადოების წარმომადგენლებიც გამოეხმაურნენ. ერთ-ერთი მათგანი ცისანა სეფიაშვილი იყო, რომელიც ცაგარელისთვის დაკისრებულ 400 ლარის ოდენობის ჯარიმას გადაიხდის.

შეგახსენებთ, რომ სტუდენტური გაერთიანება "ლაბორატორია 1918"-ის წევრ ალექსანდრე ცაგარელს თბილისის საქალაქო სასამართლომ 400 ლარიანი ჯარიმა ადმინისტრაციულ სამართალდარღვევათა კოდექსის 166 და 173 მუხლის საფუძველზე დააკისრა.

Internet.ge