„ერთიანი ნაციონალური მოძრაობის“ ერთ-ერთი ლიდერი დავით დარჩიაშვილი გივი თარგამაძისა და რუს ოპოზიციონერებს შორის შეხვედრაში გასაოცარს ვერაფერს ხედავს და პოლიტიკოსების შეხვედრას ბუნებრივ პროცესს უწოდებს.

როგორც „ინტერნეტ.ჯი“-ს დარჩიაშვილმა განუცხადა, რუსეთის დემოკრატიული ძალებთან შეხვედრები ხშირია, კერძოდ ეს შეხვედრები იმართება საერთაშორისო ღონისძიებების ფარგლებში ან ეს ლიდერები საქართველოში ჩამოდიან.

„პირადად მე, გარიკ კასპაროვს შევხვედრივარ რაც მეამაყება. ვიღაცა პუტინს შეხვედრია და პაკლოვნაია გარაზე მდგარა, რაც პრობლემაა, თორემ დემოკრატიული ძალები რომ ერთმანეთთან ურთიერთობენ ეს თუ ვინმეს არ ესმის ეს მისი პრობლემაა. თარგამაძისა და რუსულ ოპოზიციურ ძალებთან შეხვედრაში გასაოცარს ვერაფერს ვხედავ, განსხვავებით სხვებისგან, რომლებაც საბჭოური პროპაგანდული სიუჟეტი გააკეთეს და დიქტორი ამ ამბავს ტრაგიკული ხმით ყვებოდა. ეს ოპოზიციონერები პუტინის ავტორიტარულ ებრძვიან და თუ უდალცოვი  საქართველოში ჩამოვა, მას სიამოვნებით მივიღებთ“,- განაცხადა დარჩიაშვილმა.

რუსულმა ტელეკომპანია "ენ-ტე-ვემ" 2008-2012 წლების მოწვევის საქართველოს პარლამენტის თავდაცვისა და უშიშროების კომიტეტის თავმჯდომარის, გივი თარგამაძისა და რუსეთის "მემარცხენე ფრონტის" ლიდერის, სერგეი უდალცოვის შეხვედრის ამსახველი ფარული ვიდეოჩანაწერი გაავრცელა.

ვიდეოჩანაწერი მოსკოვში საპროტესტო ტალღის გაღრმავებას ეხება. ჩანაწერის მიხედვით რევოლუცია შესაძლოა კალინინგრადში დაიწყოს, სადაც რუსეთი დამატებით ჯარებს ვერ გადაისვრის, რადგან ამის გაკეთება ნატო-ს წევრი ქვეყნების ტერიტორიის გავლით მოუწევს.

internet.ge