ე.წ. "კანონიერი ქურდის" ლაშა შუშანაშვილის საქართველოში ყოფნის შესახებ შინაგან საქმეთა სამინისტროს პრესსამსახურის ხელმძღვანელი ინფორმაციას არ ფლობს.

როგორც „ინტერნერტ.ჯი“-ს სალომე მახარაძემ განუცხადა, კრიმინალური ავტორიტეტების ქვეყნიდან გასვლის, ან მათი უკან დაბრუნების შესახებ, ინფორმაცია სამინისტროში არ შესულა.

„ე.წ. კრიმინალური ავტორიტეტების საქართველოში შესაძლო შემოსვლის შესახებ განაცხადი უნდა შევიდეს შესაბამის განყოფილებაში, რის შემდეგაც ამ ინფორმაციაზე მოკვლევა დაიწყება. რაც შეეხება შუშანაშვილს, აღნიშნულთან დაკავშირებით ინფორმაციას არ ვფლობ“, - აღნიშნა მახარაძემ.

შუშანაშვილის მშობლიურ ქალაქ რუსთავში ჩასვლის შესახებ ინფორმაცია სააგენტო „ივერონმა“ გაავრცელა.

შეგახსენებთ, რომ 2012 წლის იანვარში  ლაშა შუშანაშვილი, რომელიც ლაშა რუსთავსკის სახელით არის ცნობილი, ბერძენმა სამართალდამცველებმა დააკავეს. სპეცოპერაცია ათენში, ერთ-ერთ სასტუმროში ჩატარდა. მას ბრალი კრიმინალური დაჯგუფების შექმნაში, ფულის გათეთრებაში, იარაღის უკანონო ტარებასა და მკვლელობის ორგანიზებაში ედებოდა. 

ლაშა შუშანაშვილი, რუსული მაფიის ლიდერების დედ ხასანისა და ზაქრო კალაშოვის დაჯგუფების წევრად ითვლებოდა. თავის დროზე ლაშა რუსთავსკი ტარიელ ონიანთან დაახლოებულ პირადაც მოიაზრებოდა, თუმცა ბოლო წლებში დანაშაულებრივი დაჯგუფებები ერთმანეთს დაუპირისპირდნენ. 

შუშანაშვილს რუსეთის მოქალაქეობაც ჩამოართვეს და პერსონა ნონ გრატას სტატუსით, ქვეყნიდან გააძევეს. ბოლო წლების განმავლობაში ის ევროპას აფარებდა თავს და რუსული მაფიის სხვადასხვა სფეროს კურირებდა. 

კრიმინალის დაკავებასთან დაკავშირებით კომენტარი მაშინ საგარეო უწყებაშიც გააკეთეს. მინისტრის მოადგილე ნინო კალანდაძის განცხადებით, შუშანაშვილს არა მხოლოდ საქართველო, არამედ ესპანეთიც ეძებდა და შესაბამისად, მინისტრის მოადგილის განცხადებით, დამნაშავის ექსტრადიციას ორივე ქვეყანა ითხოვდა, თუმცა მაშინ, ბერძენმა სამართალდამცავებმა შუშანაშვილი პატიმრობიდან გაათავისუფლეს.

Internet.ge