სასჯელაღსრულების მოქმედი მინისტრი გიორგი ტუღუში აცხადებს, რომ სანამ პარლამენტი ახალ მთავრობას არ დაამტკიცებს ის სამინიტროში ყველაფერს გააკეთებს იმისთვის, რომ გადაბარების პროცესი ნორმალურ ვითარებაში გაგრძელდეს.

როგორც ტუღუშმა სასჯელაღსრულების მინისტრობის კანდიდატ სოზარ სუბართან პირისპირ შეხვედრის შემდეგ განაცხადა, მომავალ მინისტრთან სისტემაში არსებულ ვითარებაზე ისაუბრა.

„შეხვედრაზე ბატონ სოზარს გავაცანი რა გაკეთდა ჩემი  მინისტრობის პერიოდში, რა მდგომარეობაა სამინისტროში ფინანსურად და სად არის ძირეული პრობლემები აღმოსაფხვრელი“,- განაცხადა გიორგი ტუღუშმა.

თავის მხრივ სასჯელაღსრულების მინისტრობის კანდიდატი  სოზარ სუბარი დარწმუნებულია, რომ სასჯელაღსრულების სისტემაში არსებული მძიმე ვითარება მალე შეიცვლება.

როგორც სუბარმა მოქმედ მინისტრ გიორგი ტუღუშთან შეხვედრის შემდეგ განაცხადა, მხარეებმა შეხვედრაზე სამინისტროში და სასჯელაღსრულების დაწესებულებეში არსებული მდგომარეობა, ლაითურის ციხის მშენებლობა და ჯანდაცვის საკითხები განიხილეს.

„სისტემაში ძალიან ბევრი რამ არის შესაცვლელი, ჩემი მთავარი პრიორიტეტი სისტემის გაადამიანურება და კორუფციის აღმოფხვრაა. ციხეებში იმაზე რთული და მძიმე მდგომარობაა, ვიდრე ჩვენ წარმოგვედგინა“,- განაცხადა სუბარმა.

internet.ge