საქართველოს სამ რაიონში განმეორებით ჩატარებული არჩევნების წინასწარი შედეგები ცნობილია.

როგორც ცესკოს პრესსპიკერმა ეკა აზარაშვილმა განაცხადა არჩევნები თერთმეტივე უბანზე მშვიდ ვითარებაში ჩატარდა.

„ყველა ოქმი ატვირთულია ცესკოს ვებ გვერდზე. მნიშვნელოვანი დარღვევები არ დაფიქსირებულა“,- განაცხადა აზარაშვილმა.

ცესკოს მონაცემებით, სიღნაღის ნომერ 5-ე საარჩევნო უბანზე ხმის დათვის

პროცედურა დასრულდა და ხმები შემდეგნაირად გადანაწილდა -  "ქართული ოცნების" მაჟორიტარი დეპუტატობის კანდიდატმა გელა გელაშვილმა 527 ხმა მიიღო, "ნაციონალური მოძრაობის" კანდიდატმა ლევან ბეჟაშვილმა კი - 86.

კენჭისყრაში მონაწილეობა 623 ამომრჩეველმა მიიღო.

ხაშურის მაჟორიტარი დეპუტატი “ქართული ოცნების” წარმომადგენელი ვალერი გელაშვილი გახდა.

ცესკოს მონაცემებით, ცხრა უბანზე რეგისტრირებული 10.381 ამომრჩევლიდან, კენჭისყრაში მონაწილეობა დაახლოებით 28 პროცენტმა, 2929 ადამიანმა მიიღო.

კერძოდ, "ნაციონალური მოძრაობის" მაჟორიტარი დეპუტატობის კანდიდატ სერგო ქიტიაშვილს მხარი  112 ადამინმა დაუჭირა, ხოლო ვალერი გელაშვილმა ხმების 91, 8 პროცენტი მიიღო.

არჩევნებზე ხაშურში 52 საარჩევნო უბანი ფუნქციონირებდა.

რაც შეეხება გორის მეოთხე უბანს. წინასწარი შედეგებით, ხმები შემდეგნაირად გადანაწილდა -  "ქართული ოცნების" მაჟორიტარი დეპუტატობის კანდიდატს მალხაზ ვახტანგაშვილს ხმა მისცა 397 ადამიანმა, ხოლო "ნაციონალების" კანდიდატ გიორგი ტატიშვილს კი, ხმა 32 ამომრჩეველმა მისცა.

სულ რეგისტრირებული 1415 ამომრჩევლიდან კენჭისყრაში მონაწილეობა 429 ადამიანმა მიიღო.

11 საარჩევნო უბანზე მაჟორიტარული სისტემით 2012 წლის საქართველოს პარლამენტის არჩევნების განმეორებითი კენჭისყრა გაიმართა.

საარჩევნო უბნებზე ხმის მიცემის პროცესი, კანონმდებლობის შესაბამისად, 08:00-დან 20:00 საათამდე იყო შესაძლებელი.

 internet.ge