პრემიერ-მინისტრობის კანდიდატის, ბიძინა ივანიშვილის განცხადებით, სადაზღვეო პაკეტთან და მოსახლეობის უნივერსალურ დაზღვევასთან დაკავშირებულ საკითხზე საუბარს ის დღეს თავს აარიდებს.

როგორც დღეს, პარლამენტში გამოსვლისას ივანიშვილმა განაცხადა, თუ აღნიშნული დაპირების განსახორციელებლად დამატებითი ფინანსების მოძიება გახდება საჭირო, ის ამას კანონიერი გზით გააკეთებს.

„დღეს თავს ავარიდებდი ამ კითხვას, თუ არ იქნება შესაძლებლობა, რომ ბიუჯეტში გამოინახოს შესატყვისი სახსრები, მე გამოვნახავ პირად სახსრებს და კანონიერ გზებს. უკეთესი იქნება თუ ამის საჭიროება არ დადგება“,- განაცხადა ივანიშვილმა დეპუტატ გიგი წერეთლის მიერ დასმულ კითხვაზე პასუხად.

დღესვე, ივანიშვილს კითხვა სოფლის მეურნეობაში დაპირებულ პროგრამაზეც დაუსვეს.

„პროგრამა ამოქმედდება ძალიან სწრაფად. ჩვენ გპირდებოდით, რომ დამატებით თანხებს გამოვნახავდით ბიუჯეტის გარეთ და ჩვენი ხელისუფლებაში მოსვლის პირველივე დღიდან შევისწავლით ბიუჯეტს. თუ რეალურად შესაძლებელი არ იქნება, რომ აღნიშნული პროგრამა ბიუჯეტიდან დაფინანსდეს, ჩვენ ამას კანონიერი გზით დავაფინანსებთ“,- განაცხადა ივანიშვილმა.

internet.ge