“თავისუფალი საქართველო“ თბილისის საკრებულოს გადაწყვეტილებას, დასუფთავების გადასახადის სეზონურ გაიაფებაზე, არ ეთანხმება და აღნიშნული ინიციატივის წინააღმდეგია.

პარტია მიმართავს ახალ ხელისუფლებას, ჩაერიოს ამ საკითხში და საკანონმდებლო რეგულაციებით, ცენტრალური საბიუჯეტო სახსრების გამოყენებით, მოახდინოს მოსახლეობისთვის მიუღებელი სისტემის შეცვლა.

„თავისუფალი საქართველო“ წინააღმდეგია აღნიშნული ინიციატივის, ვინაიდან საკრებულო იღებს სეზონურ ტარიფს, ხოლო სისტემა რჩება იგივე. აღსანიშნავია, რომ თბილისიელების პროტესტი სწორედ დასუფთავების და ელექტროენერგიის გადასახადის ერთმანეთზე მიბმამ გამოიწვია და საზოგადოების მოლოდინი, 1-ლი ოქტომბრის შემდეგ, ამგვარი საკითხების დარეგულირებაა“,- ნათქვამია გავრცელებულ განცხადებაში.

საკრებულოს სხდომა, სადაც აღნიშნულ გადაწყვეტილებას დაამტკიცებენ, ერთ საათში დაიწყება.

შეგახსენებთ, რომ თბილისის საკრებულოს კომიტეტების გაერთიანებულ სხდომაზე მიღებული გადაწყვეტილებით, დასუფთავების ტარიფი 5 თვით შეიცვლება და ამ პერიოდის განმავლობაში დასუფთავების 1 კილოვატზე 5 თეთრის ნაცვლად, 2.5 თეთრი იქნება.

internet.ge