საკანონმდებლო ორგანოსთან დაკავშირებულ საკითხებს აუდიტორები შეისწავლიან. ამის შესახებ ჟრნალისტებს პარლამენტის თავმჯდომარე დავით უსუფაშვილმა განუცხადა.

მისი თქმით, ჯერჯერობით ობიექტი ჩაბარებული არ არის და შენობას  არც უსაფრთხოების შემოწმება გაუვლია.

სპიკერის ინფორმაციით, დღევანდელი მდგომარეობით ირკვევა, რომ პარლამენტის მშენებლობისთვის 342 მლნ ლარამდეა დახარჯული, თუმცა ზოგიერთი საკითხი ჯერ კიდევ გაურკვეველი რჩება.

„როგორც ჩანს, ამ ყველაფერის მოგვარება ნაწილ-ნაწილ ხდებოდა. ჩვენ დაინტერესებულები ვართ, რომ ეს შენობა იყოს უსაფრთხო და ამიტომ, უნდა გავარკვიოთ როდის დასრულდება ამ შენობის მშენებლობა. ხვალ ან, ზეგ  ჩვენი ძალებით შესწავლის პროცესს დავასრულებთ და შემდგომ მივმართავთ აუდიტის სამსახურს ან კერძო აუდიტორებს, რომ ეს ყველაფერი იქნეს შესწავლილი და ჩვენ გავერკვეთ ვის რა საკითხზე უნდა მივმაროთ. რადგან ამ შენობაში ვმუშაობთ და პარალელურად სამშენებლო სამუშაოები მიმდიანერობს, გამოდის, რომ შენობაში უკანონოდ ვართ შემოსულები, რადგან ის ოფიციალურად ჩაბარებული არ არის“, - განაცხადა უსუფაშვილმა.

ამასთან, სპიკერმა იუსტიციის სამინისტროში განთავსებულ პარლამენტის სერვერებზეც ისაუბრა და განაცხადა, რომ მინისტრ თეა წულუკიანის ინიციატივას მიესალმება.

„ყველა საკითხი გასარკვევია, რადგან  სერვერები და საინფორმაციო ბაზების დაცვა ხარჯებთან არის დაკავშირებული“, - დასძინა მან.

Internet.ge