საგარეო ურთიერთობათა კომიტეტის სხდომაზე დღის წესრიგით გათვალისწინებული საკითხები განიხილეს. კომიტეტმა "მუდმივმოქმედი საპარლამენტო დელეგაციების შესახებ“ საქართველოს პარლამენტის დადგენილების პროექტზე იმსჯელა.
საკანონსმდებლო ორგანოს პრესცენტრის ინფორმაციით, კომიტეტის წევრების გადაწყვეტილებით, აღნიშნულ დადგენილებას ოთხშაბათს, პარლამენტის პლენარულ სხდომაზე განიხილავენ, ხუთშაბათს კი, საგარეო ურთიერთობათა და საპროცედურო საკითხთა და წესების გაერთიანებულ საკომიტეტო სხდომაზე დელეგაციების კონკრეტულ წევრებს დაამტკიცებენ.

კომიტეტის სხდომაზე "საქართველოს მთავრობისა და ისრაელის სახელმწიფოს შორის საჰაერო მიმოსვლის შესახებ“ შეთანხმება განიხილეს, რომელიც ეკონომიკისა და მდგრადი განვითარების მინისტრის მოადგილემ, ნათია მიქელაძემ წარმოადგინა. შეთანხმების თანახმად, ავიასაწარმოებს საშუალება ეძლევათ განახორციელონ საერთაშორისო საჰაერო მიმოსვლა საქართველოსა და ისრაელის ტერიტორიებზე არსებულ ნებისმიერ პუნქტებს შორის. რაც შეეხება მიმოსვლის ტარიფებს - იგი ავიასაწარმოების დამოუკიდებლად, ღია ბაზრის პრინციპით განისაზღვრება.

ფინანსთა მინისტრის მოადგილემ, დავით ებრალიძემ კომიტეტის წევრებს საერთაშორისო ხელშეკრულებები წარუდგინა. კერძოდ კი, "საქართველოს მთავრობასა და თურქეთის რესპუბლიკის მთავრობას შორის საქართველოში "ბაქო-თბილისი-ყარსის“ ახალი სარკინიგზო ხაზის "ახალქალაქი-ყარსის“ მონაკვეთზე დაგეგმილი სარკინიგზო გვირაბის მშენებლობის ხელშეწყობის შესახებ“ და "ამერიკის შეერთებულ შტატებსა და საქართველოს შორის დახმარების შესახებ ხელშეკრულების ნომერი მეორე და მესამე ცვლილებების“ შეთანხმებები.

კომიტეტის წევრებმა მოიწონეს წარმოდგენილი ხელშეკრულებები და მხარი დაუჭირეს მათ პლენარულ სხდომაზე გატანას. სხდომის დასასრულს, კომიტეტის წევრმა, აკაკი მინაშვილმა კომიტეტის თავმჯდომარეს, თედო ჯაფარიძეს კომიტეტთან არსებული საკონსულტაციო საბჭოს შექმნის ინიციატივით მიმართა. საუბარია საგარეო პოლიტიკის ექსპერტ-სპეციალისტების კომიტეტის მუშაობაში ჩართულობაზე. აღნიშნული ინიციატივა კომიტეტის წევრებმა ერთსულოვნად გაიზიარეს.
internet.ge