რუსთავის ციხის ტერიტორია ამ წუთებში სასჯელაღსრულების მინისტრის მოადგილემ და გენერალური ინსპექციის უფროსმა დატოვეს.

გენერალური ინსპექციის უფროსის, მირზა სუბელიანის განცხადებით, რუსთავის N16  დაწესებულებაში ხვალ გენერალური ინსპექციის თანამშრომლები შევლენ და ვითარებას შეისწავლიან.

რუსთავის N16 დაწესებულებასთან კვლავ რჩებიან მსჯავრედებულების მშობლები, მათ ხელმოწერებიც შეაგროვეს დაწესებულების უფროსის, ლევან აბურჯანიას გათავისუფლების მოთხოვნით, რომელსაც პრემიერ-მინისტრ ბიძინა ივანიშვილს გადასცემენ.

შეგახსენებთ, რომ რუსთავის N16 დაწესებულებასთან მსჯავრდებულების მშობლები აქცია მესამე დღეა გრძელდება, პატიმრების ახლობლები მათი მოთხოვნების დაკმაყოფილებამდე დაშლას არ აპირებენ.

სახალხო დამცველის აპარატის ინფორმაციით, პატიმრების განცხადებით, დაწესებულებაში დირექტორის შეცვლის შემდეგ, დაიწყო ძველი მეთოდების დამკვიდრება - პატიმრებს დაუწესდათ გაუმართლებელი შეზღუდვები, კერძოდ, აღარ აძლევენ ეკლესიაში გადასვლის საშუალებას, საკანში სარეცხის გაფენის უფლებას, მიუხედავად იმისა, რომ ამისთვის სპეციალურად გამოყოფილი ადგილი არ არსებობს. მსჯავრდებულთა განცხადებით, ახალი დირექტორი პატიმრებს ემუქრება სასჯელის დამატებით, სპეცდანიშნულების რაზმის შემოყვანით. მათი თქმით, პატიმრებს უმიზეზოდ სჯიან და გადაყავთ სამარტოო საკანში.

მსჯავრდებულების განცხადებაში ასევე აღნიშნულია, რომ #16 დაწესებულებაში განთავსებულნი არიან პატიმრები, რომლებისთვისაც ახალ დირექტორს, ლევან აბურჯანიას, პოლიციაში მუშაობის დროს, „ჩადებული“ აქვს ნარკოტიკი და რომლებიც ნაცემი ჰყავს.

internet.ge