ციხის სკანდალური კადრების ავტორი ვლადიმერ ბედუკაძე საქართველოში ჩამოსვლას და სამართალდამცავებთან თანამშრომლობას გეგმავს. ამის შესახებ „ინტერნეტ.ჯი“–ს მოძრაობა „ჩემი საქართველოს“ ლიდერმა ელისო კილაძემ განუცხადა.

კილაძის თქმით, ბედუკაძემ პირადად მას სთხოვა დახმარება.

„მას შემდეგ რაც ლადო ბედუკაძის პოლიტიკური თავშესაფრის საკითხი გადაწყდება, ის   საქართველოში დაბრუნებას და  გამოძიებასთან თანამშრომლობას აპირებს. მე ვიყავი პირი, ვისაც მან სთხოვა ოჯახის უსაფრთხოებაში დახმარება. თუ ლადო ბედუკაძე გადაწყვეტს, რომ მე უნდა გავავრცელო დამატებით რამე ინფორმაცია, პრობლემა არა მაქვს“,– განაცხადა კილაძემ.

„ინტერნეტ.ჯი“–ს ინფორმაციით, ბედუკაძის ოჯახი სამშობლოში პირველ ნოემბერს,  17:00 საათზე დაბრუნდა.

ისინი სტამბულიდან თბილისის აეროპორტში  ჩამოფრინდნენ. ბედუკაძის ოჯახს "ჩემი საქართველოს" ლიდერი ელისო კილაძე და ბიზნესმენი თამაზ ელიზბარაშვილი დახვდნენ.

„მას შემდეგ რაც ქვეყანაში პოლიტიკური რეალობა შეიცვალა, მე  ბიზნესმენ თამაზ ელიზბარაშვილთან ერთად დავხვდი ლადო ბედუკაძის ოჯახს აეროპორტში. ლადო ბედუკაძემ ოჯახის სამშობლოში დაბრუნების გადაწყვეტილება თავად მიიღო“,– განაცხადა ეკლისო კილაძემ.

გამოძიების ინფორმაციით, მე-8-ე საპყრობილის მორიგე ინსპექტორმა ვლადიმერ ბედუკაძემ პატიმართა წამებისა და ღირსების შელახვის კადრები გაავრცელა. იგი სასჯელაღსრულების დეპარტამენტის თანამშრომელთა მიმართ საქართველოს პროკურატურაში მიმდინარე გამოძიების ფარგლებში იძებნება და ბრალი დაუსწრებლად აქვს წაყენებული.