ლანჩხუთის რაიონის სოფელ ნიგვზიანში, მართლმადიდებელ და მუსლიმურ მოსახლეობას შორის მშვიდობიანი ურთიერთობის აღდგენის მიზნით, ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე ეკა ბესელია დღეს სახალხო დამცველის აპარატის წარმომადგენელს, ნიგვზიანის მოქალაქეებს და საქართველოს სამუსლიმანო სამმართველოს წევრებს შეხვდა.
 
პარლამენტის პრესსამსახურის ინფორმაციით, ეკა ბესელია საკითხს ადგილზე გაეცნო, შეხვდა იქ მცხოვრებ მუსლიმანებსა და მართლმადიდებლებს, დაათვალიერა მუსლიმური ლოცვის ადგილი, სადაც 2 ნოემბერს ინციდენტი მოხდა. „მე არ დავარქმევ კონფლიქტს, რადგან ეს იყო სოფლის მოსახლეობის აზრთა სხვადასხვაობის გამოხატვა“,-განაცხადა კომიტეტის თავმჯდომარემ. მისივე თქმით, პატრიარქის ლოცვა-კურთხევით გაიმართა შეხვედრა, რომელსაც მეუფე იაკობი, მეუფე იოსები და საქართველოს სამუსლიმანო სამმართველოს მუფტი ჯემალ პასქაძე ესწრებოდნენ. 

ეკა ბესელიას მიაჩნია, რომ კონსენსუსამდე მისვლა დიალოგითაა შესაძლებელი და არა დაპირისპირების პროვოცირებით. მისივე თქმით, მნიშვნელოვანია ყველა მხარის მოსმენა და, თემის სენსიტიურობიდან გამომდინარე, საკითხისადმი ფრთხილი მიდგომა. ეკა ბესელიამ კიდევ ერთხელ განმარტა, რომ საქართველო ტოლერანტული ქვეყანაა, სადაც აღმსარებლობისა და რწმენის თავისუფლება საქართველოს კონსტიტუციითაა დაცული. 

სახალხო დამცველის აპარატის წარმომადგენლის, გიორგი მშვენიერაძის განცხადებით, სამართალდამცავები უნდა იყვნენ სათანადოდ ინფორმირებულები, რომ რელიგიური წესების აღსრულების ხელის შეშლა სისხლის სამართლის კოდექსით რეგულირდება და არავის აქვს მისი შეზღუდვის უფლება. 

სამუსლიმანო სამმართველოს მუფტმა, ჯემალ პასქაძემ მადლობა გადაუხადა ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარეს საკითხზე დროული რეაგირებისა და მისი მშვიდობიანი მოგვარებისთვის.

internet.ge