შინაგან საქმეთა ყოფილი მინისტრის, ბაჩო ახალაის განცხადებით, ის მზად არის ყველა არსებულ კითხვას უპასუხოს და ნებისმიერ ფორმატში ყველასთან ითანამშრომლოს.

აღნიშნულთან დაკავშირებით განცხადება, ახალაიამ ტელეკომპანია “რუსთავი 2”-ისთვის მიცემულ ინტერვიუში გააკეთა.

მისი თქმით, ყველა მის წინააღმდეგ გაჟღერებული ბრალდება აბსურდულია და ახლა დროა ყველაფერს პასუხი გაეცეს.

“იმისათვის, რომ ქვეყანაში ხელისუფლების გადაბარების პროცესი მშვიდად დასრულებულიყო, აუცილებელი იყო ქვეყანა დროებით დამეტოვებინა. იყო რიგი განცხადებები, რომ ვიღაცეები სისხლისღვრას აპირებდნენ, რაც აბსურდული იყო და ამიტომ ერთადერთი სწორი გზა მე მგონია იყო, ის, რომ ქვეყანა დამეტოვებინა”,- განაცხადა ახალაიამ.

მისი თქმით, ახლა დადგა დრო, როცა ყველაფერი ნათელი გახდება, თუ რა ხდებოდა სინამდვილეში. “დასრულდა გადაბარების პროცესი და ახლა უკვე მე მაქვს უფრო მეტი კითხვა და დროა თვითონ უპასუხონ”,- დასძინა ახალაიამ.

internet.ge