თავდაცვის მინისტრი ირაკლი ალასანია პროკურატურის მიერ გაერთიანებული შტაბის უფროსის გიორგი კალანდაძის დაკავებას სამწუხარო ფაქტად აფასებს.

როგორც მან აღნიშნა, დღეს მოხდა სამწუხარო ფაქტი და ბრალი წაუყენეს გაერთიანებული შტაბის უფროსს.

"ეს საკმაოდ მძიმე ბრალდებაა, მაგრამ თავის სიტყვას გამოძიება იტყვის. მინისტრი მიმდინარე გამოძიებაზე ვერანაირ კომენტარს ვერ გააკეთებს. ყველა ადამიანი უდანაშაულოა, ვიდრე მისი ბრალი არ დამტკიცდება სასამართლოში. შესაბამისად, ჩვენ პატივს ვცემთ უდანაშაულობის პრეზუმფციას", - აღნიშნა ალასანიამ.

შეგახსენებთ, რომ სამართალდამცველებმა შს ყოფილი მინისტრი ბაჩო ახალაია, გაერთიანებული შტაბის უფროსი გიორგი კალანდაძე და მეოთხე ბრიგადის მეთაური ზურაბ შამათავა დააკავეს.

ქვეყნის მთავარი პროკურორის არჩილ კბილაშვილის განცხადებით, "გამოძიებით დადგინდა, რომ 2011 წლის ოქტომბერში, თავდაცვის მინისტრმა ბაჩანა ახალაიამ, გაერთიანებული შტაბის უფროს გიორგი კალანდაძესთან და მეოთხე ბრიგადის მეთაურ ზურაბ შამათავასთან ერთად, მინისტრის სამუშაო კაბინეტში 6 სამხედრო მოსამსახურეს ფიზიკური და სიტყვიერი შეურაცხყოფა მიაყენა“.

internet.ge