თბილისში ცნობილი შვედი საზოგადო მოღვაწის - რაულ ვალენბერგის 100 წლისთავისადმი მიძღვნილი ღონისძიებები გაიმართა: ევროპის სახლში ფოტოგამოფენა „რაულ ვალენბერგი - ადამიანი რომელმაც შეცვალა სამყარო“ გაიხსნა, სადაც გამოფენილია ვალენბერგის მოღვაწეობის ამსახველი დოკუმენტური ფოტომასალა. ასევე გაიმართა სემინარი მისი მოღვაწეობისა და ჰოლოკოსტის შესახებ. დაინტერესებულ პირებს კი შესაძლებლობა ჰქონდათ შვედური მხატვრული ფილმი - „საღამო მშვიდობისა მისტერ ვალენბერგ“ ენახათ და ცნობილი პიროვნების საქმიანობას უკეთ გაცნობოდნენ.

ვალენბერგის საიუბილეო ღონისძიებაში აქტიურად ჩაერთო თბილისის მერია. მზიურში, რაულ ვალენბერგის ხსოვნის უკვდავსაყოფად, ზეთისხილის ნერგების დარგვაში თბილისის მერმა გიგი უგულავამ, ისრაელის, შვედეთისა და უნგრეთის სრულუფლებიანმა ელჩებმა, ასევე თბილისში სპეციალური ვიზიტით მყოფმა ვალენბერგის ფონდის დირექტორმა ქ–ნ.მარია ტუმამ მიიღეს მონაწილეობა. 

შვედი დიპლომატი, რაულ ვალენბერგი წლების განმავლობაში ბუდაპეშტში შვედეთის დიპლომატიური მისიის თანამშრომლად მუშაობდა. შვედური პასპორტების დარიგებითა და შვედური სახლების დაარსების გზით მან ათი ათასობით ებრაელი იხსნა ჰოლოკოსტისგან. 1945 წელს ვალენბერგი საბჭოთა ძალებმა დააპატიმრეს. რუსეთის განცხადებით, ვალნბერგი საბჭოთა ციხეში გარდაიცვალა 1947 წელს, თუმცა არსებობს ვარაუდიც, რომ იგი გაცილებით გვიან გარდაიცვალა. 

მსოფლიოს მასშტაბით ვალენბერგისადმი მიძღვნილი არაერთი მონუმენტი, ძეგლი და მემორიალი არსებობს. მისი ხსოვნა უკვდავყოფილია წიგნებში, მუსიკალურ ნაწარმოებებსა და ფილმებში; მის სახელს ატარებს შენობები, მოედნები, ქუჩები, სკოლები თუ სხვა დაწესებულებები.

internet.ge