სოფლის მეურნეობის მინისტრი ზაზა გოროზია ნატახტარში საგაზაფხულო სასოფლო-სამეურნეო სამუშაოების მიმდინარეობას დაესწრო და ახალი იტალიური ტექნიკით მიწის კულტივაციის პროცესს ადგილზე გაეცნო.

გოროზიას განცხადებით, ახალი ტექნოლოგიის დანერგვა  გლეხის შრომას გაამარტივებს, მნიშვნელოვნად გაზრდის მიწის ნაყოფიერებას და მოსავლიანობის გაზრდას შეუწყობს ხელს.

„ჩვენ უკვე შემოვიყვანეთ და რეგიონებში გავანაწილეთ 40 ერთეული კულტივატორი, დამატებით 40 ცალს უახლოეს მომავალში შევიძენთ და გავანაწილებთ. ამ ახალი ტექნოლოგიის დანერგვა გაამარტივებს გლეხის შრომას, მნიშვნელოვნად გაზრდის მიწის ნაყოფიერებას და ხელს შეუწყობს მოსავლიანობის გაზრდას, რაც  შემოსავლების მატებას განაპირობებს“, განუცხადა ზაზა გოროზიამ ჟურნალისტებს.

სამინისტროს ინფორმაციით, ახალი ტექნიკით ნიადაგის დამუშავება, უკვე მოხნულ ფართობებს სარეველებისგან სრულად ათავისუფლებს, უზრუნველყოფს ნიადაგში ღრმად არსებული ბელტების დაშლას; ხელს  უწყობს  მიწის გაფხვიერებას, ზედაპირის მოსწორებას და თესვისწინა პერიოდისთვის ნიადაგის სრულფასოვან დამუშავებას.

სოფლის მეურნეობის განვითარების და ფერმერთა დახმარების პროგრამით შემოტანილი იტალიური წარმოების 40 ერთეული მიწის მთლიანი დამუშავების კულტივატორი საქართველოს ყველა რეგიონშია განაწილებული.

Internet.ge