დღეიდან იუსტიციის სახლებში მოქალაქეებს დაცვის პოლიციის სერვისებით სარგებლობის შესაძლებელობა ეძლევათ. როგორც სამინისტროს მიერ გავრცელებულ განცხადებაშია აღნიშნული, სიახლე პირველად ქუთაისისა და  ბათუმის იუსტიციის სახლში დაინერგა.

„საკუთარი მომსახურების იუსტიციის სახლის სერვისცენტრებში დანერგვა დაცვის პოლიციის ახალი პროექტის ფარგლებში ხორციელდება. „საიმედო დაცვის პირველი საფეხური - ყველაფერი ერთ სივრცეში" იუსტიციის სახლებში - ბათუმში, ქუთაისსა და რუსთავში დაცვის პოლიციის ელექტრონული მომსახურების შეტანას გულისხმობს. მარტივი კომუნიკაციისთვის სტენდზე მოთავსებული იქნება სპეციალური (touch screen) მონიტორი, რომლის საშუალებითაც ყველა დაინტერესებულ პირს შეუძლია გაგზავნოს საკუთარი საკონტაქტო მონაცემები დაცვის პოლიციაში. მათ უმოკლეს დროში დაუკავშირდებიან დაცვის პოლიციის ოპერატორები და გააცნობენ დეტალურ ინფორმაციას დაცვითი სერვისების შესახებ. სტენდებში ასევე გამოიფინება საინფორმაციო ფლაერები, ბროშურები, ბუკლეტები ქონების, თუ ბიზნესის უსაფრთხოების შესახებ.

"საიმედო დაცვის პირველი საფეხური - ყველაფერი ერთ სივრცეში"- დაცვის პოლიციისა და იუსტიციის სამინისტროს უკვე მეორე ერთობლივი ინოვაციური პროექტია. გასული წლის ოქტომბერში დაცვის პოლიცია პირველი ორგანიზაცია გახდა, რომელმაც საკუთარ სერვისებში ID ბარათების ინტეგრაცია შეძლო.  იუსტიციის სახლების გარდა დაცვის პოლიცია მსგავსი საინფორმაციო-საკომუნიკაციო სტენდების განთავსებას სხვა ადმინისტრაციულ და ბიზნეს ორგანიზაციებშიც გეგმავს“,- ნათქვამია იუსტიციის სამინისტროს მიერ გავრცელებულ განცხადებაში.

Internet.ge