აშშ-ის ხელისუფლებამ მიიღო გადაწყვეტილება, საჯარო გახადოს ნაწილი იმ დოკუმენტებისა, რომლებიც პაკისტანში, „ალ ქაედას“ ლიდერის განადგურების ოპერაციისას იპოვეს. „ასოშეიტედ პრესის“ ცნობით, მიმდინარე კვირას, დოკუმენტები ნიუ-იორკის შტატში, აშშ-ის სამხედრო აკადემიაში განთავსებულ ანტიტერორისტულ ცენტრში გამოიფინება.

კონკრეტულად რომელ დოკუმენტებზეა საუბარი, ჯერ-ჯერობით, უცნობია. თუმცა როგორც გაზეთი „გარდიანი“ ცოტა ხნის წინ იუწყებოდა, შესაძლოა, საზოგადოებისთვის ცნობილი გახდეს ბინ ლადენის ინსტრუქციები, რომლებითაც ის მის მიმდევრებს ასწავლიდა, ყურადღებით შეერჩიათ ტერაქტების მსხვერპლი. გარდა ამისა, გაზეთი წერდა, რომ წარმოდგენილი იქნებოდა დოკუმენტები, რომლებშიც აღწერილია, თუ როგორ აპირებდა „ალ-ქაედას“ ლიდერი ტერორისტული ქსელის იმიჯის შეცვლას.

როგორც ცნობილია, ბინ ლადენის სახლში პაკისტანში, სადაც მსოფლიოს ნომერ პირველი ტერორისტის განადგურება მოხდა, აღმოაჩინეს მისი უბის წიგნაკი. არაოფიციალური მონაცემებით, აღნიშნულ წიგნაკში გაკეთებული ჩანაწერები მომავალი ტერაქტების გეგმებს ეხება. Internet.ge