აფეთქებების ხმა მახაჩკალაში თითქმის ზედიზედ გაისმა. კიროვის რაიონის პოლიციის პოსტთან ჯერ მანქანა აფეთქდა, ზუსტად 10 წუთში კი იმავე ადგილზე, როცა იქ პოლიციის თანამშრომლები მივიდნენ, თვითმკვლელმა ტერორისტმა მეორე ბომბი მოიყვანა მოქმედებაში - იუწყება სააგენტო „რია ნოვოსტი“.

პოლიციის მონაცემებით, თავი ორმა თვითმკვლელმა ტერორისტმა აიფეთქა.

პირველი აფეთქების სიმძლავრემ 10, მეორისამ კი 50 კილოგრამი ტროტილის ექვივალენტი შეადგინა. შედეგად, დიდია მსხვერპლიც. დაიღუპა 15 ადამიანი, 110 კი დაჭრილია, ისინი ჰოსპიტალიზებულნი არიან. დაღუპულებს შორის არიან პოლიციელები და მეხანძრეები, რომლებიც შემთხვევის ადგილზე სამართალდამცველებთან ერთად მივიდნენ.

შემთხვევის ადგილზე დაზიანებულია 30-მდე ავტომანქანა, ასევე ახლომდებარე შენობები. დაზიანდა დაბალი წნევის გაზსადენიც.

ტერაქტის შედეგების ლიკვიდაციაში 94 ადამიანი და 23 ერთეული ტექნიკაა ჩართული.

გამოძიებამ საქმე ტერაქტის მუხლით აღძრა. დაღესტნის პრეზიდენტმა მაგომედსალამ მაგომედოვმა მოსკოვში მივლინება შეწყვიტა და სასწრაფოდ დაბრუნდა რესპუბლიკაში.

Internet.ge