რუსეთიდან დევნილი ოლიგარქი, რომელიც ამჟამად ლონდონში ცხოვრობს, ადამიანს, ვინც პუტინს დაიჭერს, 500 მილიონ რუბლს ჰპირდება. ეს ათჯერ მეტია, ვიდრე ცოტა ხნის წინ ბორის ბერეზოვსკის მიერ დაწესებული 50 მილიონი.
ამის შესახებ ბიზნესმენმა თავის Facebook-ის გვერდზე დაწერა.

მან დასძინა, რომ „პუტინი და მისი თანამზრახველები ჩვენ ცოცხლები გვჭირტდებიან, რათა დამნაშავეების წინააღმდეგ სამართლიანი ღია სასამართლო ჩავატაროთ, რომელიც ნიუნბერგის პროცესის მსგავსი იქნება“ - წერს ბერეზოვსკი.
„მილიონების მარშთან“ დაკავშირებით, რომელიც რუსეთის სხვადასხვა ქალაქებში გუშინ ჩატარდა და სავარაუდოდ, სხვადასხვა ფორმით კვლავაც გაგრძელდება, ბერეზოვსკი წერს, რომ ამ აქციის გამო „ხელისუფლება შიშისგან კანკალებს და კრემლთან ყველა მისასვლელს კეტავს“.

ის ასევე წერს, რომ მზადაა სასამართლოს წინაშე პასუხი აგოს იმის გამო, რომ 1999-2000 წლებში მხარს უჭერდა ვლადიმერ პუტინს.

ბიზნესმენის აზრით, რუსეთის მოქალაქეებს აქვთ უფლება, არ დაუშვან პუტინის ინაუგურაცია, რომელიც მოსკოვში დღეს იმართება, რადგან მისი თქმით, ეს პუტინის მიერ „ხელისუფლების ძალისმიერი გზით მიტაცებაა“.