რუსული თვითმფრინავი Superjet-100 – ჯაკარტაში, საჩვენებელი ფრენის შესრულებისას, რადარებიდან გაქრა. რუსული საინფორმაციო სააგენტოების ცნობით, თვითმფრინავის ბორტზე 44 ადამიანი იმყოფებოდა, მათ შორის არიან ძირითადად კომპანიის თანამშრომლები და ჟურნალისტები.

ინდონეზიაში, იმ ადგილას, სადაც, სავარაუდოდ, თვითმფრინავი უნდა ჩამოვარდნილიყო დასახლებული პუნქტია, თუმცა ავიაკატასტროფის შესახებ არავის არაფერი გაუგია. ამ ფაქტზე დაყრდნობით, სპეციალისტები ვარაუდობენ, რომ თვითმფრინავი არ ჩამოვარდნილა.

რუსული სააგენტო „vesti.ru“ - ინდონეზიელი მაშველებისა და საჰაერო ინსტრუქტორების პირველ კომენტარებს ავრცელებს.

„უამინდობა და ცუდი ხილვადობა ხელს გვიშლის თვითმფრინავის აღმოჩენაში. ამ დროისათვის ძებნაში ჩართულია რამდენიმე სამაშველო მანქანა და ვერტმფრენი, იმედი გვაქვს რომ ავიაკატასტროფას ადგილი არ ჰქონია,“– განაცხადა ინდონეზიის სამაშველო სამსახურის უფროსმა.

ჯაკარტას საავიაციო გაერთიანების უფროსის თქმით კი, ინდონეზიის ტერიტორიაზე თვითმფრინავის ჩამოვარდნა არ დასტურდება, ამიტომ ისინი ვარაუდობენ, რომ თვითმფრინავი ჯერ კიდევ ფრენას განაგრძობს.

Internet.ge