„თავისუფალი საქართველო“ გურჯაანის რაიონში მდებარე ნავთობის ღია ჭაბურღილის კონსერვაციას ითხოვს. როგორც „ინტერნეტ.ჯი“-ს პარტიის გურჯაანის რაიონული ორგანიზაციის თავმჯდომარე  გიორგი ქოროღლიშვილმა აცნობა, გურჯაანის რაიონში, სოფელ ჭანდარში, სამონასტრო კომპლექსის სიახლოვეს, არსებული ნავთობის ჭაბურღილი გაიხსნა და მოსახლეობას საფრთხეს უქმნის.

„ბოლო დროს გახშირებულმა წვიმებმა, წყალდიდობებმა და ხე - ტყის მასობრივმა გაჩანაგებამ გამოიწვია ამ ჭაბურღილის გახსნა, საიდანაც გამოჟონილი ნავთობი ერევა სოფ. ჭანდარის ხევში მიმავალ წყალს. ეს ხევის წყალი გადის მოსახლეობის სახნავ - სათეს სავარგულებზე. ნიადაგში გაჟონილი ნავთობი ანადგურებს როგორც ნათესებს, ისე მრავალწლიან ნარგავებს. ატმის ხეებს, ბაღ - ვენახებს, რომელთა მოვლა მოსახლეობას ძვირი უჯდება. ხევში გამდინარე დაბინძურებული წყალი, გარდა იმისა რომ ხალხს წყალში უყრის ნაშრომს, ასევე სერიოზულ საფრთხეს უქმნის მათ ჯანმრთელობას“,- აცხადებენ „თავისუფალ საქართველოში“.

პარტია „თავისუფალი საქართველო“-ს გურჯაანის რაიონული ორგანიზაცია მოითხოვს მუნიციპალიტეტის ხელმძღვანელობამ სასწრაფო რეაგირება მოახდინოს და  მოხდეს ჭაბურღილების კონსერვაცია.

Internet.ge