დღეს, პარლამენტში ფოტოგამოფენა - „მხარი დაუჭირე თამბაქოსაგან თავისუფალ გარემოს” გაიხსნა, რომლის მიზანია საზოგადოების ინფორმირება თამბაქოს კონტროლის სფეროში ცვლილებების აუცილებლობის შესახებ და თამბაქოსაგან თავისუფალი პოლიტიკის გატარების წამოწყება და მხარდაჭერა.

ფოტოგამოფენაზე წარმოდგენილი იყო სხვადასხვა ქვეყანაში მოქმედი პიქტოგრამული გაფრთხილებები თამბაქოს მოწევის შესახებ, ასევე ფოტოსურათები თამბაქოს მავნებლობასა და მისი მოხმარების შესახებ ზოგადსაგანმანათლებლო და სამედიცინო დაწესებულებებში.

ფოტოგამოფენა პროექტის - „საქართველოში თამბაქოსაგან 100%-ით თავისუფალი პოლიტიკის გატარება სამედიცინო და საგანმანათლებლო დაწესებულებებში" ფარგლებში განხორციელდა.   

გამოფენა საქართველოს პარლამენტის თავმჯდომარის მოადგილემ, გიორგი წერეთელმა  და საქართველოს პირველმა ლედიმ,  სანდრა ელისაბედ რულოვსმა გახსნეს. 

წერეთლის განცხადებით, დღევანდელი გამოფენით  რეალურად ახალი  ფართომასშტაბიანი კამპანია დაიწყო. 

„გადახედილი იქნება თამბაქოს საწინააღმდეგო სტრატეგია. რეალურად ციფრები შემაშფოთებელია, ჩვენი მოსახლეობის საკმაოდ დიდი ნაწილი, განსაკუთრებით ახალგაზრდობა  რეგულარულად ეწევა და ეს მათ ჯანმრთელობასთან პირდაპირ კავშირშია.  ჩვენ გვინდა, რომ მიღებული კანონები ეფექტურად ავამოქმედოთ, ყურადღება მივაქციოთ ინდუსტრიასთან მუშაობას, მაქსიმალურად შეზღუდული იყოს თამბაქოს  რეკლამა და  წინა პლანზე  ცხოვრების  ჯანსაღი წესი იყოს წამოწეული.  დღეს ამ შინაარსის გამოფენა გაიმართა და  ამის ავანგარდში არის სწორედ ქალბატონ სანდრას ჯანსაღი ცხოვრების წესის ინიციატივა სხვა არასამთავრობო  ორგანიზაციებთან ერთად“, – აღნიშნა წერეთელმა.

დღევანდელი ფოტოგამოფენა გაიმართა საქართველოს პირველი ლედის ჯანსაღი ცხოვრების წესის ინიციატივა "Don’t Worry, Be Healthy”-სთან თანამშრომლობით.

Internet.ge