საინფორმაციო ვებ-გვერდი regnum.ru, ცხინვალის რეგიონთან დაკავშირებით, კავკასიის უსაფრთხოების საკითხში რუსი სამხედრო ექსპერტის შეფასებებს აქვეყნებს, თუმცა თანამოსაუბრის ვინაობას, მისივე თხოვნის საფუძველზე, არ აკონკრეტებს. ანონიმი ექსპერტი საუბრობს იმაზე, რომ რუსეთმა შესაძლოა, დაკარგოს ცხინვალის რეგიონი, თუკი ეს უკანასკნელი საქართველოსკენ გაიხედავს. ასეთ შემთხვევაში კი, მისი თქმით, ოსების მიერ აღმოჩენილი კონტრასტი რუსეთის სასარგებლო ნამდვილად არ იქნება.

„არის ინფორმაცია საქართველოსა და სამხრეთ ოსეთს შორის პირდაპირი ეკონომიკური ურთიერთობების დაწყებაზე, საზღვრისპირა ბაზრების აღდგენასა და რესპუბლიკის მოქალაქეებისათვის საქართველოს ჯანდაცვის სისტემის მომსახურებით სარგებლობისთვის ოფიციალური ნებართვის გაცემაზე. გარდა სადაზვერვო მოღვაწეობისა, რომელიც ასეთი იდეების ირგვლივ ყვავის, შეიძლება თამამად ვამტკიცოთ, რომ კონტრასტი რუსეთის სასარგებლოდ სულაც არ იქნება. 

ევროკავშირის შესაბამისი დახმარებისა და საქართველოს ადმინისტრაციული სისტემის მუშაობის ბევრად კარგად ორგანიზების ფონზე, შედეგები, შესაძლოა, რუსეთის მთელი საგარეო პოლიტიკისთვის მარცხის ტოლფასი იყოს  და გამოუსწორებელი დანაკარგები მიაყენოს პუტინის რეპუტაციას“ - ამბობს რატომღაც საკუთარი გვარისა და სახელის გამხელის მოწინააღმდეგე ექსპერტი.