სანიაღვრე ქსელებისა და გზების რეაბილიტაციაზე დახარჯული თანხების მიზნობრიობაზე საკრებულოს წევრი, "ქრისტიან-დემოკრატი" ჯაბა სამუშია სპეციალური კომისიის შექმნას ითხოვს.

ჯაბა სამუშიამ დღევანდელ ბრიფინგზე, სანიაღვრე ქსელებისა და გზების რეაბილიტაციისთვის, პირველ კვარტალში დახარჯული თანხების არამიზნობრივი ხარჯვის დამადასტურებლად დოკუმენტები წარმოადგინა.

როგორც სამუშიამ აღნიშნა, მათ გადაამოწმეს გზების რეაბილიტაციისთვის თბილისის ბიუჯეტის პირველ კვარტალში გაწეული ხარჯები და აღმოაჩინეს დარღვევები.

კერძოდ, საკრებულოს წევრმა წარმოადგინა ფოტოები იმის დასადასტურებლად, რომ რამდენიმე ქუჩაზე გზების სარეაბილიტაციო სამუშაოები არ განხორციელებულა.

"ის მონაცემები, რაც შეტანიალია ამ დოკუმენტში გადასამოწმებელია. ამიტომ ‘’ქრისტიან -დემოკრატები" შემოვდივართ წინადადებით, რომ აღნიშნული დოკუმენტის განხილვისას მერიიდიან პასუხი გაგვცეს არა რომელიმე საქალაქო სამსახურის უფროსმა,  არამედ საკუთრივ ქალაქის მერმა ან მისმა მოადგილეებმა და აგვიხსნან  თუ რასთან გვაქვს საქმე და რა მიმართულებით წავიდა თანხები ”, - განაცხადა ჯაბა სამუშიამ.

მისივე თქმით, ბიუჯეტში განსაზღვრული იყო მუხიანის აგარაკებთან კოლექტორის რეაბილიტაცია, თუმცა 12 მაისს, ღამით მოსული ძლიერი წვიმის შედეგად, მოსახლეობას პრობლემები შეექმნა.

ამასთან, სამუშიამ დასძინა, რომ წელს სანიაღვრე ქსელებისთვის სულ 300 ათასი ლარია დახარჯული მაშინ, როცა პირველ კვარტალში კონცერტებზე ხუთჯერ მეტი – მლნ 500 ათასი ლარია გამოყოფილი.

"ქრისტიან-დემოკრატების" წევრები კომისიის შექმნის საკითხს საკრებულოს დღევანდელ სხდომაზე დააყენებენ.

internet.ge