ქსანში,  გრძელვადიანი პაემნებისთვის განკუთვნილი ინფრასტრუქტურის მშენებლობა, სასჯელაღსრულების, პრობაციისა და იურიდიული დახმარების საკითხთა მინისტრმა ხათუნა კალმახელიძემ  მოინახულა.

მინისტრის განცხადებით, სასჯელაღსრულების №15 დაწესებულებაში ხანგრძლივი პაემანი რამდენიმე კვირაში ამოქმედდება.

„ხანგრძლივი პაემნის მეშვეობით სამინისტრო  ხელს უწყობს  ოჯახის წევრებთან მსჯავრდებულის უშუალო ურთიერთობას და შესაბამისად - მსჯავრდებულის რეაბილიტაციას“,- განაცხადა კალმახელიძემ.

კანონის თანახმად, მსჯავრდებულს უფლება აქვს 24 საათის განმავლობაში ისარგებლოს ხანგრძლივი პაემნით  ახლო ნათესავებთან წელიწადში 2-ჯერ, ხოლო კანონში შესული ახალი ცვლილების თანახმად, წახალისების ფორმით – წელიწადში 2 დამატებითი ხანგრძლივი პაემნით.

არასრულწლოვან მსჯავრდებულებს კი შეუძლიათ ისარგებლონ  წელიწადში 3 ხანგრძლივი პაემნით და წელიწადში ერთხელ, დამატებით 2  ხანგრძლივი პაემნით წახალისების მიზნით.

სასჯელაღსრულების სისტემაში მიმდინარე მშენებლობებზე ამ ეტაპზე ასობით მოქალაქეა დასაქმებული.

internet.ge