უკრაინის გენერალური პროკურორი ვიქტორ პშონკა აცხადებს, რომ 27 აპრილს დნეპროპეტროვსკში განხორციელებულ აფეთქებებს შესაძლოა, პოლიტიკური მოტივი ჰქონდეს. ამის შესახებ პშონკამ პრეზიდენტ ვიქტორ იანუკოვიჩთან შეხვედრაზე განაცხადა.

როგორც ცნობილია, უკრაინის სამართალდამცველებმა აფეთქებების ორგანიზებაში ეჭვმიტანილი 4 ადამიანი დააკავეს.

„გამოძიებამ უნდა დაადგინოს, რამდენად უკავშირდება ეჭვმიტანილთა პოლიტიკური სიმპათიები მათ მიერ ჩადენილ დანაშაულს“ - განაცხადა გენერალურმა პროკურორმა.

ეჭვმიტანილთა დაკავება უკრაინის სამართალდამცავი ორგანოებისა და უშიშროების სამსახურის ერთობლივი ძალისხმევით მოხდა. მანამდე გამოძიებაც ვარაუდობდა, რომ დანაშაული 4 პირის მიერ იყო ჩადენილი. მათი ქმედება კვალიფიცირდება, როგორც ტერორიზმი.

პშონკამ სხვა დეტალებიც გაახმაურა. მისი განცხადებით, დაკავებულები, ტერაქტის განხორციელებაზე უარის სანაცვლოდ,  სამართალდამცველებისგან 4,5 მილიონი დოლარის გადახდას მოითხოვდნენ,- იწყება „რბკ- უკრაინა“.

გუშინ, უკრაინის შს მინისტრი ვიტალი ზახარჩენკო აცხადებდა, რომ დაკავებულია აფეთქებებში ეჭვმიტანილი 2 ადამიანი, რომლებმაც აფეთქებები ანგარების მოტივით მოაწყვეს.

4 აფეთქება დნეპროპეტროვსკში 27 აპრილს მოხდა, რომლის შედეგად სხეულის დაზიანება მიიღო 30-მდე ადამიანმა. რამდენიმე დღეში უკრაინული მედია ტერაქტების შედეგად გარდაცვლილი 8 ადამიანის შესახებ იუწყებოდა, თუმცა ოფიციალურად ეს ინფორმაცია არავის დაუდასტურებია.

Internet.ge