ყოფილი ფეხბურთელი კახი კალაძე სამტრედიაში იმყოფება, სადაც ის „ქართული ოცნების“ მაისურში გადაცმულ რამდენიმე აქტივისტთან ერთად მშობლიური ქალაქის ქუჩებში გადაადგილდება.  ადგილზე მომუშავე „პრესა.ჯი“-ს ჟურნალისტები დაინტერესდნენ, არის თუ არა ეს კალაძის მხრიდან ერთგვარი სააგიტაციო მსვლელობა, რაზეც ფეხბურთელმა უპასუხა, რომ ის მსვლელობას არ აწყობს, უბრალოდ სამტრედიის ქუჩებში დადის.

„ეს არ არის მსვლელობა, უბრალოდ ჩემს რამდენიმე მეგობართან ერთად დავდივარ მშობლიური ქალაქის ქუჩებში, ძალიან დიდი ხანია სამტრედიაში რა ვყოფილვარ და მომენატრა ეს ქალაქი“,- განაცხადა კალაძემ.

შეკითხვაზე, აპირებს თუ არა ის სამტრედიის საფეხბურთო გუნდის ყიდვას კალაძემ განაცხადა, რომ ყველაფერი მას  შემდეგ გაირკვევა, რაც საპარალმენტო არჩევნები ჩატარდება.

„ვიცი, რომ ვიღაც-ვიღაცეები დაინტერესებულინი არიან ამ გუნდის საქმიანობით, მაგრამ ოქტომბრამდე ვერაფერს გეტყვით. არჩევნების შემდეგ გაირკვევა ვიყიდი თუ არა გუნდს, თუმცა დაინტერესება მაქვს“,- განაცხადა ფეხბურთელმა.

კახი კალაძემ ჟურნალისტების შეკითხვას, მის მიმართ აღძრულ სისხლის სამართლის საქმესთან დაკავშირებით არ უპასუხა. როგორც ფეხბურთელმა აღნიშნა, მან ამ თემაზე კომენტარი უკვე გააკეთა და არ აპირებს მილანში ჩასვლას.

კალაძისა და რამდენიმე თანამოქალაქის სამტრედიის ქუჩებში გადაადგილება ამ წუთებშიც გრძელდება. ყოფილ ფეხბურთელს თან ახლავს „ქართული ოცნების“ მაისურში ჩაცმული 10-მდე თანამოქალაქე. აღსანიშნავია, რომ კალაძის სამტრედიაში ვიზიტს მხოლოდ ტელეკომპანია „მეცხრე არხი“ და საინფორმაციო სააგენტო „ინფო 9“ აშუქებს.

Internet.ge