რუსეთის გენერალურმა პროკურატურამ გაარკვია, რომ 2011 წელს ჩრდილოეთ კავკასიის რესპუბლიკებმა კრემლის მიერ გამოყოფილი ფულიდან 2,5 მილიარდი რუბლი გააქრეს.

გენპროკურატურის ჩრდილკავკასიის ფედერალური ოლქის განყოფილების ხელმძღვანელმა არტემ მელნიკოვმა მოსკოვისთვის შოკისმომგვრელი ანალიზიც წარმოადგინა, როცა განაცხადა, რომ რუსული ბიუჯეტის ფულს ჩრდილოკავკასიელი ჩინოვნიკები და ბანდიტები, რომლებსაც კონტრტერორისტული ოპერაციის ფარგლებში, უკვე, წლებია, ებრძვიან, ერთმანეთში იყოფენ.

„ამ ფულის ნაწილი ბანდიტურ იატაკქვეშეთში მიდის, რომელიც მუდმივად ეძებს კონტაქტსა და სიახლოვეს კორუმპირებულ ჩინოვნიკებთან“ - განაცხადა მან.

მოსკოვში ჩრდილოკავკასიის რესპუბლიკების დაფინანსების თემა დიდი ხანია სადაო გახდა. გარკვეული წრეები მიიჩნევენ, რომ „საკმარისია კავკასიის კვება“, ისინი ამ შინაარსის ლოზუნგებით ხელისუფლებისგან ჩრდილოკავკასიის რესპუბლიკებისათვის დაფინანსების შეწყვეტას მოითხოვდნენ. თუმცა ეს რესპუბლიკები ამ დრომდე რჩება რუსეთისათვის ყველაზე „ძვირადღირებულ პროექტად“, რომელიც რუსეთის ფედერაციის სხვა რეგიონებთან შედარებით ყველაზე მაღალდოტაციურია. მხოლოდ გასულ წელს ფედერალური ბიუჯეტიდან ამ რესპუბლიკებისთვის 270 მილიარდი რუბლი გადაირიცხა.

მოსკოვს ეშინია, რომ დაუფინანსებლობის პირობებში ჩრდილოეთ კავკასიაში ვითარება გამწვავდება, რაც მისთვის სასიკეთო შედეგებს არ გამოიღებს.

 Internet.ge