ნოვოსიბირსკში, 50 წლის ქალმა პარტია „ეძინაია რასიას“ ოფისის მისაღებში, თავის დაწვა სცადა. თავის მოკვლა მან „ნოვოსიბირსკის სამშენებლო კომპანიასთან“ გამართული სასამართლო დავის გამო გადაწყვიტა, რომლისგანაც მშენებარე კორპუსში ბინა იყიდა. მოგვიანებით, შემსყიდველმა გადაიფიქრა და სასამართლოს მიმართა გადახდილი თანხის უკან დაბრუნებისა და მორალური ზიანის ასანაზღაურებლად. სასამართლომ ქალბატონის სარჩელი არ დააკმაყოფილა, თუმცა სამშენებლო კომპანიამ მას ფული დაუბრუნა.

„ეძიანაია რასიას“ რეგიონული განყოფილების ხელმძღვანელის, ნაძეჟდა ბოლტენკოს თქმით, ქალბატონმა ვალენტინა გერასიმოვამ 30-ჯერ მაინც მიმართა პარტიას კონსულტაციისთვის, რასაც თვითმკვლელობის მუქარაც სდევდა თან.

დღეს, მორიგი კონსულტაციის დროს, ვალენტინა გერასიმოვამ სითხით სავსე ქილა ამოიღო, მშრალ ხელსახოცებსა და სანთებელასთან ერთად, და თავის დაწვას შეეცადა. მამაკაცებმა ქალისთვის წაკიდებული ცეცხლის ჩაქრობა პიჯაკებით მოახერხეს.

თვითმხილველთა მიერ გადაღებულ ვიდეოში ჩანს, რომ ქალის მოქმედების შედეგად, შენობის მეორე სართულზე ხანძარი გაჩნდა, რის გამოც 87 ადამიანის ევაკუირება გახდა საჭირო. შემთხვევის შედეგად 5 ადამიანი დაშავდა: თავად ვალენტინა გერასიმოვა, რომელსაც სხეულის 80% დამწვარი აქვს, და პარტიის 4 თანამშრომელი. ყველა დაშავებული ჰოსპიტალიზებულია.

Internet.ge