უშბის მწვერვალზე სამაშველო ოპერაცია დღეს დილიდან განახლდა.  მაშველებმა უბედური შემთხვევის შედეგად დაღუპული რუსი ალპინისტის მესტიაში გადმოსვენება შეძლეს. ჯგუფის დანარჩენი წევრების მწვერვალიდან დაშვება კი ეტაპობრივად მიმდინარეობს.

რაც შეეხება უშბაზე, 4500 მეტრის სიმაღლეზე ჩარჩენილ სომეხ მთამსვლელს, ქართველმა მაშველებმა მისთვის საკვები პროდუქტებისა და საგანგებო აღჭურვილობის მიწოდება შეძლეს. ალპინისტის გადმოყვანას მაშველთა ჯგუფი დღის პირველ ნახევარში გეგმავს.

არსებული ინფორმაციით, სომეხი მთამსვლელი უშბის დაპყრობას ცდილობდა, თუმცა ვერ მოახერხა და უკვე მესამე დღეა მწვერვალზე იმყოფება.

სამაშველო ოპერაციაში შინაგან საქმეთა სამინისტროს საგანგებო სიტუაციების მართვის დეპარტამენტის თანამშრომლები, მესტიის სამაშველო სამსახურის წარმომადგენლები და ადგილობრივი მთამსვლელები მონაწილეობენ.

შეგახსენებთ, რომ სამი ალპინისტი უშბის დასალაშქრად იყო წასული, სადაც უბედურ შემთხვევას ერთი მთამსვლელი ემსხვერპლა.

internet.ge