„ახალი მემარჯვენეების“ ერთ–ერთი ლიდერი და საარჩევნო სიების დაზუსტების კომისიის თავმჯდომარე მამუკა კაციტაძე ამბობს, რომ გარკვეულ პოლიტიკურ  სუბიექტებს აქვთ მიზანი კომისიის ლანძღვითა და კრიტიკით, ივანიშვილის ოცნების კარზე თავი დაიმკვიდრონ.  „პრესა.ჯი“– ს მამუკა კაციტაძე ესაუბრა. 

- გამოქვეყნდა NDI-ს კვლევის შედეგები, რომლის მიხედვითაც მოსახლეობის 64% არჩევნებში მონაწილეობას გეგმავს. იმოქმედებს ეს არჩევნებზე პოზიტიურად? 

- არჩევნები ქვეყნისა და სახელმწიფოს ცხოვრებაში, უაღრესად მნიშვნელოვანი მოვლენაა. შესაბამისად, არჩევნებში მოქალაქეების მაღალი ჩართულობა არის მნიშვნელოვანი დემოკრატიისთვის.  

თუ არჩევნებში, მოსახლეობის ჩართულობა დიდი იქნება, საკანონმდებლო ორგანოში პოლიტიკური ლანდშაფტი უფრო უკეთესად იქნება წარმოდგენილი. რაც მეტი ადამიანი მიიღებს არჩევნებში მონაწილეობას, მით უფრო ზუსტი იქნება პოლიტიკური განწყობები, რაც აისახება არჩევნების შედეგებში.

არსებობს ერთი კარგი გამოთქმა - „ცუდ ხელისუფლებას  ირჩევს ის კარგი ამომრჩეველი, ვინც არ მიდის არჩევნებზე“. აქედან გამომდინარე,  არჩევნებზე მისვლა, იძლევა მეტ გარანტიას საკანონმდებლო ორგანოში ობიექტური სურათის შექმნისთვის. 

-  თქვენი კომისიის მუშაობას, რომელსაც თქვენ ხელმძღვანელობთ აკრიტიკებენ ოპოზიციური სპექტრის წარმომადგენლები. მათი თქმით, კომისია ფლანგავს ფულებს და არ ასრულებს სამუშაოს. ეს ბრალდება თქვენ ჯონდი ბაღათურიამ, დიმიტრი ლორთქიფანიძემ და თამაზ დიასამიძემ წაგიყენათ... 

-  საერთოდ, ვისაც რაიმე საქმე უკეთებია ცხოვრებაში უნდა იცოდეს, რომ როცა საქმეს აკეთებ, მას სჭირდება მოსამზადებელი პერიოდი, სამუშაო პერიოდი და შემაჯამებელი პერიოდი. 

მათ ბრალდებაში უფრო ვხედავ პოლიტიკურ მოტივაციას. მათ აქვთ მოტივაცია, რომ როგორღაც დაფიქსირდნენ განსაკუთრებულ ოპონენტებად „ოცნების კარზე“ და ამით მოიპოვონ დივიდენდები.  

- „ოცნებაში“ მოსახვედრად, სიების დაზუსტების კომისიის კრიტიკა საკმარისია? 

- მათი დამოკიდებულება ივანიშვილის მიმართ ცნობილია. მათ აქვთ ლტოლვა, რომ ამ კოალიციაში გარკვეული ადგილი დაიმკვიდრონ. განსაკუთრებით ცუდ დღეში არიან ისინი, ვისაც პოლიტიკური პარტია არ გააჩნიათ, ან გააჩნიათ ერთი პირის საწარმოს დონის პარტია.   

თუ „ოცნების კარზე“ ვინმეს თავის დამკვიდრება უნდა ჩემ ხარჯზე, პირდაპირ ვეუბნები, რომ ცუდი არჩევანია. ამის საფუძველს არ მივცემ. პოლიტიკურ კეკლუცს,  ჩემს ხარჯზე არ დავუშვებ. როგორც ჩანს, კეკლუცის რესურსიც რეგლამენტირებულია მათთან.  

- ვალერი გელბახიანმა განაცხადა, რომ ბიძინა ივანიშვილი ბადრი პატარკაციშვილთან ერთად აპირებდა პოლიტიკაში მოსვლას, მაგრამ გადაიფიქრა. გქონდათ, თავის დროზე, ამასთან დაკავშირებით რაიმე სახის ინფორმაცია?   

- არ ვიცი რა ინფორმაციას ფლობს ვალერი გელბახიანი პატარკაციშვილისა და ივანიშვილის ალიანსზე. შემიძლია ვთქვა სხვა რამ... ივანიშვილი იყო ნომერ პირველი კონკურენტი ბადრი პატარკაციშვილისა საქართველოსთან მიმართებაში. იმ სეგმენტში, რასაც სერიოზული ფინანსური რესურსის ფლობა ჰქვია.  

ეს კონკურენცია ვლინდებოდა პერიოდულად სხვადასხვა მიმართულებით. ეს იქნებოდა მედია, დონორობა თუ სხვა. მოდით, მე ერთ რამეს გეტყვით და განსასჯელად დავტოვოთ ქართული საზოგადოებისთვის. 

ივანიშვილი საუბრობს, რომ ხელისუფლებას ზურგი შეაქცია 2008 წლის იანვრის ბოლოს. მე ცოტა სხვა ინფორმაცია მაქვს და ლოგიკაც სხვაზე  მეტყველებს. ბიძინა ივანიშვილმა მიხეილ სააკაშვილთან პოლიტიკური ზურგშექცევის გადაწყვეტილება მიიღო არა იანვრის ბოლოს, არამედ 2008 წლის თებერვლის ბოლოს. 

იანვრის ბოლოსა და თებერვლის ბოლოს შორის მოხდა ერთი ფაქტი - გარდაიცვალა ბადრი პატარკაციშვილი. ბიძინა ივანიშვილს ჩამოსცილდა კონკურენტი და მან რეალურად დაიწყო თავისი თამაში. ივანიშვილმა პატარკაციშვილის გარდაცვალებით იხეირა... 

ბიძინას  თავისი პოლიტიკური მიზნები ჰქონდა და ეს მიზნები პატარკაციშვილის კონკურენციაში ცხადდებოდა.  მან, თავისი მიზნების გამხელა, დაიწყო 2011 წლის ოქტომბრიდან და არ დაიწყო 2008 წლის ზაფხულიდან, როცა პოლიტიკური ოპოზიცია სერიოზულ ბრძოლაში იყო სააკაშვილთან. 

ამ პოლიტიკურ ოპოზიციას ბიძინა ივანიშვილი 2008 წლის იანვრის არჩევნებში ეწინააღმდეგებოდა. შემდეგ საპარლამენტო არჩევნებში, ის ჩრდილში დადგა და არ დახმარებია ოპოზიციას. 2009 წელიც ყველას ახსოვს, 111 დღიანი აქციები და მაშინაც არ გამოჩნდა ივანიშვილი პოლიტიკურ სცენაზე. 

როცა ოპოზიცია დაძაბუნდა და დასუსტდა, ივანიშვილმა იფიქრა, რომ მისი ოპო-საჭეთმპყრობლობის დრო მოვიდა და გამოვიდა ავანსცენაზე. ეს რომ არ დაინახო, ან არ უნდა გინდოდეს დანახვა, ან ბრმა უნდა იყო.

შორენა გოგოლაძე 

[presa.ge]