სოფო ნიკოლაშვილი, რომელიც სასამართლო დარბაზიდან 2 აპრილს გაათავისუფლეს, ოჯახის წევრებთან კონტაქტს გაურბის. ის მომხდარზე არ საუბრობს და რეაბილიტაციის კურსს ფსიქოლოგებთან გადის.

პატიმრობიდან გათავისუფლებული ჟურნალისტის, სოფო ნიკოლაშვილის მამა, დავით ნიკოლაშვილი „ინტერნეტ.ჯი“-სთან შვილის ფსიქოლოგიურ მდგომარეობაზე  პირველად საუბრობს.

დავით ნიკოლაშვილი: "სოფოს ირგვლივ განვითარებულმა მოვლენებმა, 20 წლის მოზარდის ფსიქიკაზე მძიმედ იმოქმედა, ამიტომ სპეციალისტებთან მიყვანა გახდა საჭირო.

- პატიმრობაში ყოფნის მიზეზებზე თუ გესაუბრათ?

- არა, რაც რუსთავის ქალთა კოლონია დატოვა, არავის  გვეკონტაქტება, საკუთარ თავში ჩაიკეტა, არავის ნახვა და მომხდარზე საუბარი არ სურს.

- სასამართლომდე მომხდარს პოლიტიკურ საქმიანობას უკავშირებდით და ამბობდით, რომ სოფო ბიძინა ივანიშვილისთვის მოქალაქეობის აღსადგენად შეგროვებული ხელმოწერების გამო დაისაჯა...

- სოფო არსდროს აგროვებდა ივანიშვილისთვის ხელმოწერებს. 

- დაკავებისთანავე სოფომ სიბაშვილის განზრახ მკვლელობის მცდელობა მის გაუპატიურებას დაუკავშირა. შემდეგ კი თვითონვე უარო ეს ფაქტი, თქვენ თუ ფლობთ ამ თემაზე დამატებით ინფორმაციას?

- როგორ გგონიათ, მამა შვილის ამბავს ბოლომდე არ გამოიძიებს? სასამართლო გაიმართოს და ჩემს სათქმელს აუცილებლად ვიტყვი.

- სოფო ჟურნალისტებთანაც არიდებს კომენტარის გაკეთებას თავს? სასამართლოდან გამოსვლისას, მას კოლეგებთან კომენტარის გაკეთება სურდა, მაგრამ ახლობლებმა ამის საშუალება არ მიეცით...

- სოფო ჟურნალისტია და ესმის რომ თემა გაინტერესებთ, პორობას გაძლევთ, სასამართლოს შემდეგ სოფოს კონენტარს მოისმენთ.

“კახეთის ხმის” ჟურნალისტი, 20 წლის სოფო ნიკოლაშვილი, 2 აპრილს,  სასამართლო დარბაზიდან, 5 ათას ლარის გირაოს სანაცვლოდ გაათავისუფლეს. ნიკოლაშვილის ქონებას ყადაღა დაედო და ჟურნალისტის ოჯახს აღნიშნული თანხის გადასახდელად 30 დღე მიეცა.

ნიკოლაშვილი, 31  იანვარს, გურჯაანში, იარაღის უკანონო ტარებისა და განზახ მკვლელობის მცდელობის ბრალდებით დააკავეს. ნიკოლაშვილის საქმეზე სასამართლო გადაწყვეტილებას 25 თებერვალს გამოიტანს.

აღნიშნულ საქმეზე, სამთავრობო საათზე, შს მინისტრის მოადგილე ეკა ზღულაძემაც ისაუბრა. მინისტრის მოადგილის განცხადებით, იმის გათვალისწინებით, რომ თავდამსხმელი ქალბატონია, ადვოკატი და პროკურატურა შეძლებისდაგვარად მუშაობენ ნაკლებად მძიმე აღმკვეთ ღონისძიებაზე.

Internet.ge