საქართველოში ოპოზიციური ძალების გამარჯვება არ ნიშნავს, რომ აფხაზეთთან მიმართებაში რაიმე მნიშვნელოვანი ცვლილებები მოხდება. ასეთი განცხადება გააკეთა აფხაზეთის ე.წ. პარლამენტის ვიცე-სპიკერმა ემა გამისონიამ, ბიძინა ივანიშვილის განცხადების კომენტირებისას იმის შესახებ, რომ „აფხაზებსა და ოსებს რამენაირად უნდა მივეფეროთ, მეტი სითბო და სიყვარული დავანახოთ - წერს სააგენტო „რეგნუმი“.

„ასეთ პოლიტიკურ ხელოვნებას აფხაზეთი და სამხრეთ ოსეთი უკვე მიეჩვია. იგივეს ლაპარაკობდნენ და აკეთებდნენ, როცა ხელისუფლებაში სააკაშვილი იყო. თავიდან ჩვენს მიმართ სიძულვილი იყო, ახლა კი თამაში - სიყვარულით. მთავარია არა სიტყვები, არამედ მოქმედება, პოლიტიკური ნაბიჯები. თუ ხელი მოეწერება სამშვიდობო შეთანხმებას, მაშინ საქართველოსთან ნებისმიერ ფორმატში მოლაპარაკების წარმოება შესაძლებელი იქნება, და მაშინ შეიძლება ვილაპარაკოთ ცვლილებებზე,“ - განაცხადა გამისონიამ.

საქართველოში მიმდინარე მოვლენებიდან გამომდინარე ცვლილებების მოლოდინი არც აფხაზ მეცნიერს ირინა აგრბას აქვს. ისიც, ურთიერთობის საწყისად სამშვიდობო შეთანხმებაზე ხელმოწერას მიიჩნევს.

„დრო გვიჩვენებს, წავა თუ არა ახალი ხლისუფლება ამაზე“ - განაცხადა მან.

აგრბა ამბობს, რომ სააკაშვილსა და ივანიშვილს შორის განსხვავებას ვერ ხედავს და დასძენს, რომ  „ნებისმიერი ცვლილება, რომელიც საქართველოში ხდება, დასავლური პროექტის შემადგენელი ნაწილია“.

Internet.ge