აფხაზეთის მარიონეტული რეჟიმის ოფიციალური წარმომადგენლის, კრისტიან ბჟანიას განცხადებით, აფხაზეთში საქართველოში ჩატარებულ არჩევნებზე კომენტარები არ კეთდება, რადგან „ჩვენ სხვა პოლიტიკურ სივრცეში ვცხოვრობთ“ - განაცხადა ბჟანიამ და აღნიშნა, რომ ერთადერთი, რასაც აფხაზეთი საქართველოსგან მოელის, დამოუკიდებლობის აღიარებაა.

„ჩვენ, უპირველეს ყოვლისა, საქართველოსგან მხოლოდ პრობლემებს ველოდებით. საქართველოში ჯერ არასოდეს მოსულა ხელისუფლება, რომელსაც შეიძლება დავუჯეროთ... ჩვენ ველოდებით საქართველოსგან მხოლოდ ერთს - ჩვენი დამოუკიდებლობის აღიარებას. მაგრამ როდის მოვა ასეთი ხელისუფლება საქართველოში, ჩვენთვის უცნობია“ - განაცხადა ბჟანიამ.

„იზვესტიას“ კითხვაზე, აქვს თუ არა აფხაზეთს იმედი, რომ ივანიშვილი, სხვა, სოხუმისათვის სასარგებლო მიმართულებით განიხილავს აფხაზეთის საკითხს, ბჟანიამ განაცხადა, რომ „ყველაფერია შესაძლებელი, მაგრამ ის დიდი ნეგატივი, რომელიც ჩვენს ურთიერთობებში არსებობს, ჯერ არ გვაძლევს საფუძველს, რომ უკეთესი მომავლის რწმენა გვქონდეს“.

ბჟანიას თქმით სოხუმი არ აპირებს საქართველოს ახალ ხელისუფლებასთან ურთიერთობას და პირველ ნაბიჯებს თბილისისგან მოელიან.