საპარლამენტო არჩევნების შედეგები იძლევა შესაძლებლობას, დაიწყოს  „კონსტრუქციული დიალოგი“ თბილისსა და სოხუმს შორის, რათა „დაგროვილი პრობლემები“ გადავჭრათ და „კონფლიქტს წერტილი დავუსვათ“ - წერენ მოსკოვის ევრაზიული კლუბის ხელმძღვანელი პაველ ზარიფულინი და სოხუმის ხალხთა დაცვის მოძრაობის კოორდინატორი  ბესლან კობახია „ქართული ოცნებისადმი“ მიმართვაში.

თუმცა ამ „კონსტრუქციულ“ მიმართვას ერთი პირობა უდევს საფუძვლად - საქართველოს ახალმა პარლამენტმა ჯერ აფხაზეთის დამოუკიდებლობა უნდა სცნოს.

მიმართვაში, ქართულ-აფხაზურ კონფლიქტში ცალსახად ქართული მხარეა დადანაშაულებული, „ქართულ ოცნებას“ კი წინამორბედების შეცდომების გამოსწორებისკენ მიუთითებენ.

მოთხოვნები მიმართვაში პუნქტებადაა ჩამოყალიბებული:
1. ახალი  პარლამენტის მიერ აფხაზეთის წინააღმდეგ ომის დაგმობა.
2. აფხაზეთის დამოუკიდებლობის აღიარება და ამ საფუძველზე აფხაზებთან კეთილმეზობლური ურთიერთობების აგება.

მიმართვის ავტორები მიიჩნევენ, რომ აფხაზეთის დამოუკიდებლობის აღიარება აფხაზებისა და ქართველების ურთიერთობების გაუმჯობესებას გამოიწვევს და თანასწორობის საფუძველზე სხვადასხვა საკითხების განხილვას გახდის შესაძლებელს.

ამასთან, აფხაზეთის ე.წ. პარლამენტმა და საქართველოს საკანონმდებლო ორგანომ უნდა მიიღონ დეკლარაციები, რომ ერთმანეთის წინააღმდეგ ძალადობას აღარ ექნება ადგილი.

ეს კი კობახიასა და ზარიფულინის აზრით, განაპირობებს ორივე მხარის პოლიტიკოსებისა და საზოგადოების წარმომადგენელთა შეხვედრებს, კულტურულ, სამეცნიერო და ჰუმანიტარულ კონტაქტებს.