სოხუმში იმყოფება რუსეთის პრეზიდენტის ე.წ. სპეცწარმომადგენელი, რეალურად კი ოკუპირებულ რეგიონში დიმიტრი მედვედევის მიერ ზედამხედველად დანიშნული, კრასნოდარის მხარის გუნერნატორი ალექსანდრ ტკაჩოვი.

ის უკვე შეხვდა სეპარატისტული რეჟიმის ლიდერს. ალექსანდრე ანქვაბმა ტკაჩოვს „რუსეთ-აფხაზეთის საზღვარზე“ ავტობუსების სამოძრაოდ დამატებითი კორიდორის გახსნა სთხოვა, რაზეც დადებითი პასუხი მიიღო - იუწყება „ვესტნიკ კავკაზა“.

კერძოდ, ანქვაბმა ტკაჩოვს შესთავაზა, ძველი საფეხმავლო გზა ავტობუსების სამოძრაო კორიდორად გადაკეთდეს, რათა ტურისტებს მიმოსვლა კიდევ უფრო გაუადვილდეთ. „ადამიანები არ უნდა წუხდებოდნენ სასაზღვრო ბიუროკრატიით“ - მიაჩნია ტკაჩოვს.

მედვედევის სპეცწარმომადგენელმა „საზღვარზე“ ავტომანქანების გამშვები პუნქტიც დაათვალიერა და მისი მუშაობის გაუმჯობესება მოითხოვა.