აფხაზეთის ე.წ.გენერალურმა პროკურატურამ ბრალი წაუყენა მიმდინარე წლის 22 თებერვალს ალექსანდრე ანქვაბზე თავდასხმის საქმეზე დაკავებულ ანზორ ბუთბას, ალხას ხუტაბა და რამზი ხაშიგს.

მათი ქმედება კვალიფიცირებულია, როგორც შეიარაღებულ ბანდაში მონაწილეობა, ასევე სახელმწიფო პირის სიცოცხლის ხელყოფა მისი მოღვაწეობის შეწყვეტის მიზნით, ასევე სამართალდამცავი ორგანოების წარმომადგენელთა სიცოცხლის ხელყოფა, სადაც ტერაქტის დროს ანქვაბის დაცვის ორი წევრი სასიკვდილოდ დაიჭრა.

ბუთბა, ხუტაბა, ხაშიგი, ასევე ძებნაში მყოფი რუშბეი ბარციცი და ასტამურ ხუტაბა, როგორც გამოძიებამ დაადგინა, მოქმედებდნენ დანაშაულებრივი ბანდის შემქმნელებისა და ორგანიზატორების - პაველ არძინბასა და ალმასბეი კჩაჩის (რომელმაც ამ საქმის გამო თავი მოიკლა) მითითებით. მათი ხელმძღვანელობით 2011 წლის აგვისტოსა და ოქტომბერში, ასევე 2012 წლის 22 თებერვალს, მათ, ცეცხლსასროლი იარაღითა და ასაფეთქებელი საშუალებებით შეიარაღებულებმა, ხელყვეს ანქვაბისა და მისი თანმხლები დაცვის წევრების სიცოცხლე.

უახლოეს დღეებში გამოძიება ბრალს წარუდგენს ამ საქმის მონაწილე კიდევ ოთხ პირს - ედლარ და ედგარ ჭითანავებს, თამაზ ბარციცსა და მურთაზ საკანიას.
2012 წლის 14 მაისს, პაველ არძინბას მიმართ, რომელიც ბანდის ორგანიზატორად სახელდება და რომლის უშუალო ხელმძღვანელობითაც 2007 წელს ასევე ანქვაბზე თავდასხმა განხორციელდა, დაუსწრებლად იქნა გამოტანილი ბრალდებულად ცნობის დადგენილება. გუშინ კი ასევე დაუსწრებლად მისი დაპატიმრების გადაწყვეტილება იქნა მიღებული.

გამოძიება ასევე ამოწმებს აღნიშნული პირების სხვა სისხლის სამართლის დანაშაულებებთან კავშირსაც, - ამის შესახებ სააგენტო „აპსნიპრესი“ აფხაზეთის ე.წ. გენერალურ პროკურატურაზე დაყრდნობით წერს.