დაღესტნის პროკურატურამ აღიარა, რომ დაკარგული ადგილობრივი მცხოვრებლები, რომლებსაც ახლობლები ამ დრომდე ეძებდნენ, სპეცოპერაციების დროს მოკლეს.

ნოღაის რაიონის ორი მცხოვრები, რომლებიც სახლებში აღარ დაბრუნებულან და მათ პოლიციაც კი ეძებდა, გაირკვა, რომ სამართალდამცველებმა ყიზლარში ბოევიკების განადგურების ოპერაციისას დახოცეს, როგორც იატაკქვეშა ბანდფორმირების წევრები.

19 მარტს უფლებადამცველ ორგანიზაციას „დაღესტნელი დედები ადამიანის უფლებებისთვის“ ფატიმა ამტეევამ მიმართა, რომელიც ამბობდა, რომ მისი ვაჟი და ნათესავი სახლიდან მეჩეთში წავიდნენ და აღარ დაბრუნებულან.

მოგვიანებით, ალი ამეტოვი და ალან აპენდიევი სპეცოპერაციის დროს ლიკვიდირებულ ბოევიკთა შორის ამოიცნეს.

დაღესტნის მოსახლეობა აცხადებს, რომ ხშირ შემთხვევაში, სახლიდან დაკარგული ადამიანები უდანაშაულონი არიან და მათ მიზანმიმართულად აკერებენ ბოევიკების სტატუსს. თავად მოსახლეობაც აცხადებს, რომ ეს პირველი შემთხვევა არ არის, როცა გატაცებულ და უგზო-უკვლოდ დაკარგულ ადამიანებს მსგავსი სპეციოპერაციის დროს ლიკვიდირებულთა შორის პოულობენ.

Internet.ge