რუსეთის საგარეო საქმეთა სამინისტროს კვალდაკვალ, ნატოს ჩიკაგოს სამიტზე, საქართველოსთან დაკავშირებით მიღებული გადაწყვეტილებები სეპარატისტულმა ცხინვალმაც გააპროტესტა. განსაკუთრებით ის ნაწილი, სადაც ალიანსი რუსეთისგან მოითხოვს, გააუქმოს ოკუპირებული რეგიონების დამოუკიდებლობის აღიარების გადაწყვეტილება.

სეპარატისტული რეჟიმის ე.წ. საგარეო საქმეთა სამინისტროს აზრით, ჩიკაგოს სამიტზე მიღებული დეკლარაცია „იყო წინასწარ დაგეგმილი“ და „მიკერძოებული“, ისეთი, როგორსაც ქართული აუდიტორია მოელოდა.

„როგორც ცნობილია, სამხრეთ ოსეთი არ არის „საქართველოს რეგიონი“ და 2008 წლის აგვისტოში საქართველოს სამხედრო თავდასხმის დროს, სამხრეთ ოსეთის ხალხი სრული განადგურებისგან მხოლოდ რუსეთის ჩარევის წყალობით გადარჩა და უკვე 4 წელია სამხრეთ ოსეთის მცხოვრებთა უსაფრთხოება რუსეთის ფედერაციის მიერაა გარანტირებული“ - აცხადებენ ცხინვალში.

ცხინვალი რუსეთის საგარეო საქმეთა სამინისტროს განცხადების ტექსტს იმეორებს და ნატოს შეახსენებს, რომ ახლა „სხვა რეალობაა“, ხოლო სამხრეთ კავკასიის რუკაზე „ორი ახალი სახელმწიფო აღმოცენდა - სამხრეთ ოსეთისა და აფხაზეთის რესპუბლიკები“.

ცხინვალი იმუქრება, რომ ალიანსი „კიდევ კარგად დაფიქრდეს, ვიდრე ძალიან სახიფათო გზას დაადგება, რომელიც, შეიძლება, არაპროგნოზირებადი შედეგების მატარებელი იყოს და ახალი დაძაბულობის პროვოცირება მოახდინოს“.

ცხინვალის მარიონეტული რეჟიმის აღნიშნულ განცხადებამდე გავრცელდა რუსეთის საგარეო საქმეთა სამინისტროს ოფიციალური განცხადება, რომელშიც მოსკოვი ასევე გაღიზიანებასა და პროტესტს გამოხატავს ჩიკაგოს სამიტზე მიღებულ დეკლარაციაში, ნატოს მიერ საქართველოსადმი მხარდაჭერის დაფიქსირების გამო.

Internet.ge