რუსეთის კონტროლის პალატა აფხაზეთსა და ცხინვალის რეგიონში რევიზიას იწყებს. დავალება ვლადიმერ პუტინმა გასცა.

რუსეთის საკონტროლო-სარევიზიო უწყება იმ თანხების ხარჯვის საკითხს შეისწავლის, რომელიც სეპარატისტულ რეჟიმებს მოსკოვიდან ერიცხებოდათ. კონტროლის პალატის თავმჯდომარე სერგეი სტეპაშინი შემოწმების შედეგებს ვლადიმერ პუტინს მოახსენებს.

თანამედროვე განვითარების ინსტიტუტის მრჩეველი ნიკიტა მასლენიკოვი ამბობს, რომ რუსეთს ერთადერთი მიზანი ამოძრავებს - აფხაზეთსა და ე.წ. სამხრეთ ოსეთში აღდგენითი სამუშაოების დასრულება.

„აფხაზეთისა და სამხრეთ ოსეთის მოსახლეობის დიდ უმრავლესობას რუსული პასპორტები აქვს და ჩვენთვის მნიშვნელოვანია, რომ რუსეთის ფედერაციის მოქალაქეები ღირსეულად ცხოვრობდნენ. ყველა მატერიალური პრობლემა, რომელიც 2008 წელმა გამოიწვია, უნდა ლიკვიდირებულ იქნას“ - განაცხადა მასლენიკოვმა „ლაიფ-ნიუსთან“ საუბარში.

ექსპერტი იმასაც ამბობს, რომ რუსეთს ამ რეგიონებთან მიმართებაში თავისი ინტერესები აქვს, რომელთა შორისაც მთავარი აფხაზეთის საკურორტო როლია.

მასლენიკოვის თქმით, აფხაზეთის რეკრეაციული საკურორტო ზონების ერთობლივად განვითარებამ, საბოლოო ჯამში მნიშვნელოვანი შედეგი უნდა გამოიღოს, რაც, შესაძლოა, შავი ზღვის სანაპიროს ერთიანი კომპლექსის შექმნით დაგვირგვინდეს.

internet.ge