აფხაზი სეპარატისტები ქართულ წინასაარჩევნო კამპანიას აკვირდებიან. სოხუმის სიმპატიები აფხაზეთის საგარეო საქმეთა მინისტრმა ვიაჩესლავ ჩირიკბამ გააჟღერა. სასურველ პარტნიორებად მან კოალიცია „ქართული ოცნების“ ლიდერი ბიძინა ივანიშვილი და მისი თანამებრძოლი ირაკლი ალასანია დაასახელა.

ამის შესახებ ჩირიკბამ იტალიურ ჟურნალ „Limes“-სთან ინტერვიუში ისაუბრა, რომელიც შემდეგი სათაურით გამოქვეყნდა: „აფხაზეთი - ეს კავკასიის კოსოვოა“.

„დარწმუნებული ვარ, რომ სხვა პრეზიდენტის ხელმძღვანელობით საქართველო შეიცვლება და ჩვენ უფრო გაგვიადვილდება შეთანხმების მიღწევა. ჩვენ უფრო პრაგმატული მოსაუბრე გვჭირდება - ისეთი, როგორიცაა ალასანია ან ივანიშვილი. ივანიშვილი საქმიანი ადამიანია და შეუძლია იყოს საკმაოდ პრაგმატული, რათა გაიგოს, პრობლემის როგორი გადაწყვეტა დააკმაყოფილებს მეტ-ნაკლებად ყველა მხარეს,“ - განაცხადა აფხაზმა დიპლომატმა.

აფხაზური მხარე მუდმივად აცხადებს, რომ საქართველოს ხელისუფლებასთან შეთანხმებას მხოლოდ ოკუპირებული ტერიტორიების დამოუკიდებლობის აღიარების შემთხვევაში გამართავს, რასაც საქართველოს ამჟამინდელი ხელისუფლება გამორიცხავს.

Internet.ge