აფხაზეთისა და სამხრეთ ოსეთის სოციალურ-ეკონომიკური განვითარების საკითხებში პრეზიდენტის თანაშემწის თანამდებობის შექმნა იმ ფინანსური ნაკადების გაკონტროლების აუცილებლობამ წარმოშვა, რომლებიც ამ რესპუბლიკებში მიედინება - განაცხადა ბრიფინგზე კრემლის ადმინისტრაციის ხელმძღვანელმა სერგეი ივანოვმა.

აღნიშნულ პოსტზე ვლადიმერ პუტინმა ინაუგურაციისთანავე ყოფილი ჯანდაცვის მინისტრი ტატიანა გოლიკოვა დანიშნა, რომელიც ამ დღეებში ჯერ ცხინვალში იმყოფებოდა, ამჯერად კი სოხუმს სტუმრობს.

სერგეი ივანოვმა ხაზი გასუვა იმას, რომ აფხაზეთისა და ცხინვალის რეგიონების მოსახლეობის უმრავლესობა რუსეთის ფედერაციის მოქალაქეა და შესაბამისად, მოსკოვისთვის მნიშვნელოვანია, რომ რუსეთის ბიუჯეტიდან გამოყოფილი ფული მათთვის დაიხარჯოს. ამასთან, მათზე ისევე გავრცელდება ყველა ის შეღავათი და დახმარება, რომლითაც რუსეთის ფედერაციის სხვა მოქალაქეები სარგებლობენ.

ივანოვის თქმით, პირველხარისხოვანი საკითხები, რომლებითაც გოლიკოვა დაკავდება, იქნება პოლიკლინიკების, საავადმყოფოების, გზებისა და სხვა სოციალური და ინფრასტრუქტურული ობიექტების მშენებლობა - იუწყება რუსული მედია.

internet.ge