ცხინვალმა რუსეთის გენერალურ პროკურატურას 21 სისხლის სამართლის საქმე გადასცა, რომლებიც რუსული ფინანსური დახმარების ძარცვისა და დატაცების ფაქტებზეა აღძრული.

გამოძიებამ უნდა დაადგინოს, რაზე დაიხარჯა 2008 წლის რუსეთ-საქართველოს ომის შემდეგ გამოყოფილი 43 მილიარდი რუბლი, რომელიც რეგიონის აღდგენასა და მოსახლეობას უნდა მოხმარებოდა -წერს გაზეთი „იზვესტია“.

ადგილობრივი სამართალდამცავები თვლიან, რომ  მხოლოდ რუს ძალოვნებს შეუძლიათ ამ საქმეების ბოლომდე მიყვანა.

ცხინვალის პროკურატურაში საქმეები ბოლომდე იმიტომ ვერ მიჰყავთ, რომ ამ კორუფციულ სქემებში ძირითადად რუსეთის მოქალაქეები არიან გარეულები.

„ჩვენ ვერ შევძელით ამ საქმეების ბოლომდე მიყვანა, რადგანაც მათი ფიგურანტები რუსეთის მოქალაქეები არიან“ - განაცხადა ცხინვალის პროკურორის მოადგილე გიორგი კაბულოვმა.

43 მილიარდი რუბლი საკმაოდ დიდი თანხაა იმისათვის, რომ რეგიონი რუსული აგრესიის შემდეგ არა მარტო აღდგენილიყო, არამედ მის მაცხოვრებლებს კომფორტულადაც ეგრძნოთ თავი. მიუხედავად ამისა, ცხინვალში დღეს მხოლოდ ე.წ. კარკასები, ნახევრად აშენებული ნაგებობები და ნანგრევები დგას - წერს „იზვესტია“ და აკონკრეტებს, რომ გაფლანგულია ფული, რომელიც 2008 წლის აგვისტოს ომის შემდეგ რუსეთის ბიუჯეტმა (30 მილიარდი),  „გაზპრომმა“  (10 მილიარდი),  მოსკოვის მთავრობამ (2 მილიარდი) გაიღო, 1 მილიარდი კი საქველმოქმედო სპეცანგარიშზე მოგროვდა.

internet.ge