მმართველი გუნდის წევრის, დეპუტატ, კობა ხაბაზის შეფასებით, ბიძინა ივანიშვილი  პირსისხლიან ჯალათს – ლებედს აფინანსებდა, თუმცა ახლა,  "ნიანგის ცრემლებს" ღვრის.

პარლამენტის დღევანდელ პლენარულ სხდომაზე, ხაბაზმა 9 აპრილზე ისაუბრა და განაცხადა, რომ დავით უსუფაშვილსა და ბიძინა ივანიშვილს, 9 აპრილთან დაკავშირებით, აქამდე განცხადება არ გაუკეთებიათ, ახლა კი, ორივე "ნიანგის ცრემლებს" ღვრის.  

მისი თქმით, 9 აპრილი ცივილიზებული სამყაროსთვის ერთ–ერთი უმნიშვნელოვანესი დღე იყო, რადგან ამ დღეს, რუსეთის ბოროტების იმპერიის ნგრევა შეუქცევადი გახდა.

„დიახ, ივანიშვილზე მოგახსენებთ, რომელსაც ერთხელაც არ გახსენებია 9 აპრილი. რა შეფასება უნდა მიეცეს? – ე.წ. „ქართულ ოცნებას“, რომელსაც მე რუსულ ოცნებას ვეძახი. არც ის გამიკვირდებოდა როდიონოვი და ლებედი რომ მოეყვანათ, დაეყენებინათ და ნიანგის ცრემლებით აეტირებინათ. იმას ვერასდროს შევეგუები, რომ 9 აპრილი გახდეს გაპოლიტიკოსების მსურველთათვის ფარისევლობისა და სიყალბის არენა. სხვა რა უნდა ვუწოდო, როდესაც 9 აპრილის მეორე დღეს, 10 აპრილს, ადამიანი კომპარტიის რიგებში შედის და ახლა კი, პარლამენტის წინ მოდის და ნიანგის ცრემლებს ღვრის, ვითომ, 9 აპრილი ძალიან აწუხებს. დიახ, უსუფაშვილზე მოგახსენებთ, რომელიც  10 აპრილს, კომუნისტური პარტიის რიგებში გაწევრიანდა“, – განაცხადა დეპუტატმა.

Internet.ge