‘’რესპუბლიკური პარტიის" კანდიდატმა აშშ-ის საპრეზიდენტო არჩევნებში, მით რომნიმ, გამარჯვების შემთხვევაში, ქვეყანა, შესაძლოა, სირიასა და ირანთან ომში ჩააბას – განაცხადა აშშ-ის მოქმედმა ვიცე-პრეზიდენტმა ჯოზეფ ბაიდენმა.

‘’რომნიმ არაერთხელ უწოდა შეცდომა ერაყში ომის დასრულებას და ამერიკელი სამხედროების შინ დაბრუნებას. მან გამოსვლებისას არაერთხელ განაცხადა, რომ მზადაა ომებისთვის სირიასა და ირანში" - აღნიშნა ბაიდენმა, რაზეც ‘’რესპუბლიკელებისგან" პასუხი უკვე მიიღო:

‘’გასაკვირი არაა, რომ პოლიტიკოსი, რომელიც არცერთ საგარეო საკითხში არ იყო მართალი ბოლო 30 წლის განმავლობაში, ისევე ცდება რომნის სტრატეგიის ყველა პუნქტთან მიმართებაში, რომელიც მსოფლიოში აშშ-ისთვის ლიდერის როლის დაბრუნებას ისახავს მიზნად" - განაცხადეს ‘’რესპუბლიკელების" შტაბში.

ბაიდენმა ეს განცხადება ‘’დემოკრატიული პარტიის" ყრილობის დაწყებამდე გააკეთა, რომლის დროსაც ის და ამჟამინდელი პრეზიდენტი არჩევნებში ოფიციალურ კანდიდატებად დასახელდებიან.

Internet.ge