ჩვენ ჯანმრთელი ერი ვიქნებით - განაცხადა საქართველოს პრეზიდენტმა მმართველი გუნდის რეგიონალურ ყრილობაზე, რომელიც ზუგდიდის მთავარ მოედანზე გაიმართა.

სააკაშვილის განცხადებით, მის ოპონენტებს კოვზი ნაცარში ჩაუვარდათ, როცა პროექტ 100 საავადმყოფოს მშენებლობაზე ალაპარაკდნენ.

„ჩემი პრეზიდენტობის შემდეგ საქართველოში დაზღვეულთა რაოდენობა 100-ჯერ გაიზარდა. ახალი სახელმწიფო პროგრამით კი რომელიც ხელმისაწვდომ ჯანდაცვას გულისხმობს, კიდევ უფრო მეტი ადამიანი დაეზღვევა. ჩვენ ყველაზე ჯანმრთლი ერი ვიქნებით. რაც შეეხება საავადმყოფოების თემას, მოწინააღმდეგეს კოვზი ნაცარში ჩაუვარდა, ავაშენეთ 150 ახალი , თანამედროვე კლინიკა“,- განაცხადა მიხეილ სააკაშვილმა.

საქართველოს პრეზიდენტმა მმართველი გუნდის ზუგდიდის მაჟორიტარობის კანდიდატი როლანდ ახალაიაც დაახასიათა და მას პატიოსნებისა და პატრიოტობის მაგალითი უწოდა.

„როლანდს ბავცშვობიდან ვიცნობ, ის ყოველთვის აღშფოთებული იყო იმით, რაც სამეგრელოში ხდებოდა. იცავდა თქვენს ინტერესს. ეს თვისება მან დღემდე შეინარჩუნა. ასეთი ხალხი გვჭირდება“,- განაცხადა მიხეილ სააკაშვილმა.

საუბრის ბოლოს, მიხეილ სააკაშვილმა ზუდიდელებს მხარდაჭერისთვის მადლობა გადაუხადა და აღნიშნა, რომ სამეგრელო საქართველოს გამორჩეული ნაწილია.

„მინდა დაინახოს ჩვენმა მტერმა როგორი ერთსულოვნები ვართ. გაიგოს რომ სამეგრელო ტყუილ დაპირებებზე არ იცვლება - არ იყიდება. ჩვენ ჭკვიანი ერი ვართ და ვინც არ უნდა შემოგვიგდოთ ყველა ფალავანი დამარცხდება. ვინც არ უნდა აფათუროს ამ მიწაზე ხელი და დინგი შემოყოს, ეს მიწა არანაირ ფულზე არ იყიდება“,- დასძინა მიხეილ სააკაშვილმა.

internet.ge